Directo di AZV, Edwin Jacobs:
ORANJESTAD (AAN): Edwin Jacobs, Director di AZV a indica cu ta premira cu e crecemento economico ta bay ta menos. No ta bay keda conoce e mesun crecemento cu tabata conoce na 2023 y na 2024.
El a manifesta cu turismo ta draai economia di Aruba, pero e crecemento cu tin den turismo no ta mira den e area aki di e fondo di seguro.
Jacobs a duna di conoce cu esnan cu ta traha cu e modelo di analisis a tene cuenta cu e proyectonan di hotel cu tin den plan. A tuma diferente proyecto na cuenta pa wak cuanto trahado extra ta bin adicional y ta premira cu e crecemento economico ta bay ta menos. Ta bay sigui crece, pero e gastonan ta bay sigui aumenta mas rapido di loke e entrada ta crece, a enfatisa.
"Si nos pensa cu nos ta bay baha e gasto, n' ta berdad". Esey ta un bon remarke cu Secretario di Estado tambe a trece dilanti, Jacobs a señala.
Embehecemento ta bay trece cu ne cu mas hende ta bay tin mester di cuido. Combina cu estilo di bida cu tampoco ta contribui na esey, e gastonan ta bay ta bay sigui subi, a bisa.
Edwin Jacobs a laga sa cu a propone pa cada aña haci un estudio di eficiencia den sector. E anja aki e sector dental ta bay wordo studia, pasobra ta kere cu tin espacio pa saca eficiencia den esey. Asina mas y mas sector lo wordo analisa pa nan bira mas eficiente.
El a enfatisa cu e cantidad di hende diabetico no ta bahando. E cifranan ta sigui aumenta. E malesanan cronico ta bay sigui aumenta y tin cu prepara pa cu esaki.
