Charlene Leslie di Fundacion Diabetes Aruba
ORANJESTAD (AAN): Den un entrevista cu DIARIO, Charlene Leslie di Fundacion Diabetes Aruba a indica cu cifranan di diabetes ta halto na Aruba. El a menciona cu e pronto lo tin un mihor bista riba e cantidad di casonan, asina cu e investigacionnan keda cla, pero mester a agrega cu mundialmente e cifranan di diabetes ta halto y ta sigui aumenta.
Un di e causanan mas grandi di diabetes tipo 2, cu ta sobrepeso, e cifranan aki ta halto na Aruba. Si e cifranan di sobrepeso/obesidad ta halto esaki ta nifica cu e cifranan di diabetes tambe ta keda halto, como tambe di otro malesanan, por ehempel cardiovascular.
Leslie a indica cu e fundacion ta contento di por wak cu tin hopi hende den comunidad cu ta activo y a haci hopi cambio den nan estilo di bida, y e ta kere cu esaki ta un bon comienso. E ta enfatisa cu tur hende mester haci mas actividad fisico y haci cambionan den nan alimentacion.
Ta importante tambe pa traha riba tema di prevencion, pasobra hopi biaha hende ta warda te ora nan wordo diagnostica cu diabetes pa haci cierto cambionan den estilo di bida. Pero cu algun cambio, por preveni cu un persona ta wordo diagnostica cu diabetes. Leslie a agrega cu, hasta si un persona wordo diagnostica cu diabetes tipo 2, ainda nan por tin un calidad di bida halto, pero esaki ta segun e maneho di e persona pa e sigui cu e tratamento segun nan doctornan y maneho propio.
Leslie ta spera cu comunidad por bira mas conciente riba diabetes y haci cambionan necesario pa reduci riesgonan di diabetes. Den pasado, diabetes tabata conoci como malesa di esnan di edad mas halto, pero awendia, cu e estilo di bida actual, sobrepeso, alimentacion y otro factornan, e edad di e casonan a baha, specialmente den e grupo di 40 pa 60 aña, cu a conoce mas aumento di casonan.
Segun Leslie, den e parti di prevencion, mester pensa riba esnan mas hoben, di edad di 20-30 aña, na unda por haci hopi pa prevencion di diabetes cu cambionan den estilo di bida.
