Embahador Filipino na Den Haag a bishita Gobernador Suplente di Aruba

ORANJESTAD (AAN):  Embahador di Filipina na Den Haag, señor J. Eduardo Malaya III a hiba un bishita na Aruba di 20 pa 22 di augustus.

El a wordo acompaña pa consul di Filipina na Den Haag, señor Nomer B. Ado II y consul honorario di Filipina na Aruba, señora Ami Henriquez-Mendez. Riba dialuna 22 di augustus 2022 durante oranan di mainta e delegacion a bishita Gobernador suplente di Aruba, Su Excelencia Agustin Vrolijk.

            E reunion aki, cual señor Edwin Abath (Director DBB) tambe a forma parti di dje, a tuma luga na Gabinete di Gobernador.

            Tabata un audiencia di introduccion unda a trata entre otro e relacion entre Filipina y Reino Hulandes, e relacion cu Aruba specificamente, e semehansanan entre Filipina y Aruba y e posibilidad pa intercambia conocemento di agricultura cu e meta pa sigui desaroya esaki na Aruba.

            Embahador Malaya a conta tambe cu el a reuni cu su compatriotanan na Aruba. Lo bay tin misionnan consular na Aruba mas frecuente caminda lo ofrece trabaonan consular pa e residentenan Filipino na Aruba. 

𝘗𝘰𝘵𝘳𝘦𝘵: © 𝘒𝘢𝘣𝘪𝘯𝘦𝘵 𝘎𝘰𝘶𝘷𝘦𝘳𝘯𝘦𝘶𝘳 𝘈𝘳𝘶𝘣𝘢