Elmar ta sigui cu mantenimento di wayanan di tension halto

ORANJESTAD (AAN): Diahuebs siman pasa, pa gran parti di dia cierto area di Casibari, Piedra Plat, Sero Lopez, Sero Pita, Tamarijn, y Paradera a keda sin coriente for di 8’or di mainta te cu 4’or di atardi.

   Esey a socede debi na trabao di mantenimento cu e compania di electricidad NV Elmar tabatin planea, pa instala algun wayanan di coriente di tension halto, y haci reparacion y mantenimento den algun trafohuis tambe na e.o. Piedra Plat.

   Pa logra e trabao, nan tin di interumpi servicio di coriente pa seguridad di Linemen y Tecniconan di Kavel.  E mantenimento aki ta yuda NV Elmar haci nan red aun mas duradero y stabil di awor en adelante.

   Na Casibari a haci trabao di expansion tambe pa un bario nobo cu a wordo crea eynan.  Aki a probecha pa pone liñanan nobo di tension halto, cumpliendo cu e standard riguroso di seguridad y calidad.