Elmar ta orguyoso di nan infrastructura dinamico di Smart Grid pa conecta security camera

ORANJESTAD (AAN): E proyecto piloto a resulta exitoso y awor ta worde converti den un servicio oficial di NV Elmar pa Cuerpo Policial.

   DIARIO tabata presente Diamars merdia ora cu Ministerio di Husticia y NV Elmar a firma e acuerdo di servicio di camara di siguridad, cual lo worde instala riba e Smart Grid di e compania di electricidad.

   Esaki ta facilita KPA pa supervisa y mantene orden publico. A cera un acuerdo di servicio pa huur y mantenemento di e camara. E camara lo worde maneha completamente pa KPA, mientras cu Elmar ta brinda apoyo tecnico.

   Segun director Anthony Irausquin, danki na e bon team-work di tur nan departamento, nan habilidad di instala un camera awor ta socede den promedio di 10 minuut.  E sistema aki ta djis uno di plug & play, y e camera ta conecta su mes, y ta usa sistema avanza pa evita di por bira victima di cualkier atake cibernetico.

   E Smart Grid di NV Elmar ta un infrastructura dinamico cu ta worde utiliza pa innovacion y creaccion di productonan y servicionan nobo di NV Elmar. E Smart Grid ta permiti conexion cu e camara di siguridad, loke ta permiti KPA pa monitoria e situacion di siguridad den tempo real. Den combinacion cu otro proyecto di Smart Grid manera sistemanan di luz di caya 'smart' y medidanan di conservacion di energia, e servicio di camara di siguridad publico lo yuda nos alcansa nos meta pa sigui desaroya nos Smart Grid caminda cu ta provee nos habitantenan un ambiente sano y sigur.

   E compania a indica cu nan Smart Grid ta un fundeshi importante pa e desaroyo di tecnologia y innovacion cu ta beneficia nos comunidad.

   Elmar ta enfoca riba su responsabilidad social (CSR Corporate Social Responsibility) como compania nacional, y ta comprometi pa trece mas siguridad na Aruba. E proyecto di camara di siguridad ta un parti vital di e compromiso di Elmar pa provee un ambiente sigur pa tur esnan cu ta biba y bishita nos pais.

   Como un compania local, Elmar ta comparti e responsabilidad di utiliza su infrastructura di grid pa beneficio di e comunidad, y e instalacion di e camara di siguridad ta un testimonio di esaki, conhuntamente cu Elmar su maneho di luznan di caya.

   NV Elmar ta contento di por brinda e servicio nobo di camara di siguridad pa KPA, y nos ta keda comprometi pa continua traha duro pa innova y mehora e bida di nos habitantenan di Aruba.