ELMAR ta lansa videoclip di jingle di Chispito cu Kylie & Katya pa promove seguridad di coriente

ORANJESTAD (AAN):- N.V. ELMAR a lansa e videoclip oficial di “Chispito x Kylie & Katya - Sende!”,

un jingle crea pa promove seguridad di coriente den un forma alegre y dinamico. Cu e frase “Chispito ta bisa zap zap zieng! Seguridad prome!”, e jingle ta trece un mensahe claro riba e importancia di seguridad di coriente, specialmente cerca e siguiente generacion.

ELMAR a estrena e videoclip durante e Back to School Concert di Kylie & Katya, caminda Chispito, Kylie & Katya y NTG Dancers a presenta un dance show special pa introduci e jingle na publico. Mediante musica, baile y e personahe di Chispito, ELMAR ta presenta seguridad di coriente den un formato cu ta conecta cu muchanan y hoben den un forma “entertaining” y memorabel.

Chispito a wordo introduci pa ELMAR como un herment pa stimula mayornan pa papia cu nan yiunan y famia tocante seguridad di coriente. E personahe lo sigui forma parti di diferente iniciativa educativo y comunitario di ELMAR den cuadro di su programa di responsabilidad social corporativo (CSR), cu un enfoke special riba seguridad.