ELMAR ta haci un donacion di buki di mucha na scolnan p'ariba di brug

ORANJESTAD (AAN): N.V. ELMAR a brinda su apoyo na e donacion di e buki di mucha “Max y e Taki Encanta”,

di autora Esmeralda Tromp Jacobs, mihor conoci como Tanchi Esme, na Filomena Basis School y Teresita Basis School p'ariba di brug.

E donacion ta resultado di un colaboracion entre ELMAR y Tanchi Esme, cu e meta di stimula lesamento y amplia e coleccion di buki disponibel pa studiantenan den biblioteca di e dos scolnan.

Na 2025, ELMAR tabata sponsor principal di Festival di Buki di Mucha. E colaboracion cu Tanchi Esme ta sigui den e mesun liña di sostene lesamento cerca muchanan y promove literatura local.

“Max y e Taki Encanta” ta un buki na Papiamento, scirbi pa Tanchi Esme y ilustra pa Gairo Tromp. Cu su ilustracionnan bunita y colorido, e buki ta ofrece muchanan e oportunidad pa disfruta di lesamento den nan propio idioma. E ehempelarnan duna ta forma parti di biblioteca di e dos scolnan, unda studiantenan por lesa e buki y descubri mas literatura local.

Autora Tanchi Esme a expresa su aprecio pa e cooperacion: “Mi ta super contento cu ELMAR a forma parti di e esfuerso pa stimula lesamento na scol. Mi ta gradici boso cooperacion, cu ta haci posibel pa studiantenan haya “Max y e Taki Encanta” na Papiamento den nan biblioteca pa lesa.”

Cu e donacion aki, ELMAR ta sigui sostene iniciativanan cu ta contribui na educacion y cultura den nos comunidad, mientras cu e ta crea mas oportunidad pa muchanan descubri e placer di lesa y disfruta di literatura na Papiamento.