ORANJESTAD (AAN) - ELMAR ta continuando cu instalacion di Smart Meters rond di henter nos isla, brindando asina nan clientenan cu mas beneficio di e tecnologia moderno.
ELMAR ya a instala Smart Meters pa 50% di nan clientenan, y ta instalando mas activamente den e lunanan venidero. E barionan di Paradera (un parti), Nuñe, Babijn, Marawiel, Cristal, Matividiri y Jaburibari tur ya tin Smart Meters instala.
Den e proximo simannan, ELMAR lo continua instalacion den Santa Cruz (algun area), Papilon (algun area), Sombre, Cas Ariba, Siribana, Macuarima, Ayo, Cadushi Largo y Angochi.
Smart Meters a bira un herment esencial pa companianan di utilidad. E ta brinda varios beneficio, manera monitor e uzo di energia den tempo real y identificacion trempan di cualkier problema of asunto riba nos grid electrico.
E ta permiti maneho mas eficiente di e grid electrico, cual ta yuda reduci e periodo di interupcion di coriente. Smart Meters tambe ta brinda factura mas preciso pa clientenan.
