ORANJESTAD (AAN): Diabierna mainta a firma un CAO nobo pa empleadonan di NV Elmar.
Na e ocasion aki, director Anthony Irausquin di e compania di electricidad a splica cu despues di algun luna di negociacion cu tabata toch cu hopi respet, unda monton di idea ta wordo intercambia. A logra pone un CAO nobo riba mesa.
Pa e trahadornan, esaki nifica cu tin un structura di salario vigente desde 1 Januari caba, y esaki a trece basta cambio den e organizacion, specificamente e parti di Human Resources. Esaki tambe ta un parti cu nan a agrega den e negociacionnan pa yega na final cu otro.
Irausquin a considera esaki como un “Bon CAO”. El a mustra cu e Contrato Colectivo nobo tin condicionnan hopi bon pa cu beneficionan secundario, y pesey el a manda felicita Diego y Albertico di e Sindicato STA cu a guia e negociacionnan aki.
Manera ta conoci, NV Elmar tin su retonan tambe y pesey e compania a traha un ‘roadmap’ pa nan siguiente diez añanan pa por yega unda cu nan ta desea di yega. Esaki ta encera tanto e parti di personal, como e parti operacional cu tambe ta exigi bastante.
Tin basta inhaalmaneuvres pa haci den por ehemplo mantenimento di tanto edificionan y e grid di coriente. Tambe tin meerjaren onderhoudsplan cu tin di tene cuenta cune, unda tin di bay inverti basta placa den siguiente añanan pa por logra mantene e grid manera cu pueblo di Aruba ta exigi spera di nan compania nacional cu ta distribui y entrega coriente.
Director Irausquin a gradici tambe su team negociador di compania, cu a haci un fabuloso trabao, pa tur nan inputs, tur trahador di Elmar cu ta forma parti di e directiva di STA.
“Mi tin e confianza cu nos ta compronde otro mas y mas tur dia, nos sa cu tin basta cambio tumando lugar na Elmar, y nos tin di traha duro pa logra esaki. No ta tur biaha nos ta contento of nos por logra tur cos, pero ta hunto nos tin di haci’e pasobra ta un Elmar nos ta,” Irausquin a remarca.
“Mi ta mira esaki dia pa dia ta bin mas dilanti, nos ta compronde otro mihor, y mi tin di pone enfasis riba e respet con e negociacionnan a bay, pues pabien pa esey. Esey ta e mihor manera pa nos traha hunto y cu nos por a yega awe unda cu nos ta,” el a indica.
NV Elmar ta sigui expande pa sigui genera mas entrada, y uno di nan ta e diferente Charging Stations di capacidad grandi pa autonan electrico. E sede di Hato ta e prome na Aruba cu a haya stacionnan cu por charge auto segun e protocol di Level-3 cu ta haci esaki cu capacidad halto y rapido. Tin mas pa sigui instala rond di Aruba di Level-3 den proximo temponan.
Mester corda cu no por yena e infrastructura na Aruba cu hopi chargers, pasobra tin di tene cuenta tambe cuanto auto tin na Aruba, y cuanto hende ta sigui charge na nan cas.
