Michella Steenvoorde-Lacle, Presidente di Comision Plan di Mayor:
*Aruba ta den e top 10 di divorcio segun Divorce Science
ORANJESTAD (AAN) – Na aña 2012, Aruba tabata “top 2” di divorcio na mundo. Esaki segun datonan “Divorce Science”, Michelle Steenvoorde-Lacle, Presidente di Comision Plan di Mayor, a indica den su presentacion di e proyecto Plan di Mayor, pa Matutino DIARIO.
El a sigui bisa cu aworaki Aruba ta den e “Top 10”, segun e mesun instancia. Censo 2010, a demostra cu 32% di nos poblacion ta “one parents household” (kiermen un pariente so), y di e 32% aki 86% ta mama.
“Mi ta kere cu si e muchanan ta wordo cria door di tur dos mayor, hopi di e problemanan por wordo resolvi: menos gang, mas confidence, menos crimen, mas adulto productivo pasobra si e mama tin mas rosea, e ta bay ta mas productivo den su trabao, etc”.
Michella a haya su mes movi pa tur esaki y asina Plan di Mayor a cuminza na 2018, cu el a busca e base di apoyo, y el a puntra Bert Wielenga di Orthopedagogic Center pa ta cune, como su man drechi den e proyecto.
“Nos a cuminza pa skirbi ‘start noticie’ (esaki ta un relato cu ta wordo skirbi pa argumenta pakico un ley ta necesario) cu e ora ey a bay pa Ministerraad, cu tin cu aprobe of no aprobe. Den e start noticie nos a bisa cu nos kier un ‘nul meeting’ haci door di CBS. Anto CBS a bisa cu nan ta bay haci e ‘nul meeting’ (kico ta e situacion cero), pero nan mester un Comision Oficial di e profesionalnan cu ta cay bao di Ministerraad. E ora ey, nos a haci invitacion pa hendenan di Corte, Departamento di Asunto Social, Centro Pedagogico, etc. etc., pa nan bin forma parti di nos Comision”, Michella Lacle a indica.
Ademas, nan a bay na Departamento Huridico, y nan a bisa cu nan ta hopi ocupa y no tin tempo pa skirbi e ley, y nan a aconseha pa pidi un presupuesto, pa paga Jan de Boer pa skirbi e ley.
“Jan de Boer ta e rector cu a skirbi e cambionan di ley, cual a keda pega pa basta tempo den Parlamento, pasobra tabata tin varios ley skirbi p’e pa wordo trata”, Michella a comenta.
