Elmar haciendo instalacion moderno na un Switch Station na Playa

ORANJESTAD (AAN): Un transformator huis nobo ta wordo construi pa e area industrial. 

Esaki ta den cuadro di renobacion na e Switch Station di e compania NV Elmar cu tin den parti West Oranjestad, cu ta den zona industrial.

   Como parti di e trabaonan continuo pa mantene un suministro di coriente robusto, NV Elmar a opta pa instala un asina yama “middenspannings installatie” moderno cu por integra comunicacion. E renobacion aki ta inclui e edificio mes como tambe henter e infrastructura di coriente.

   Y manera por mira riba e potret, e trabao ta andando y ta haci e cambio y instalacion necesario di e kabelnan bao tera net banda di e Switch Station aki, cu ta ser yama tambe ‘Schakel Station”.

   E Schakel Station aki ta sirbi no solamente e area inmediato, sino tambe diferente areanan rond.

   Ora cu esaki finalisa na Playa, segun NV Elmar e siguiente trabaonan di renobacion ta sigui na transformatorhuis situa na Zeewijk. E trabaonan di renobacion aki ta continuo, pa mantene un distribucion di coriente confiabel.