Elimina 'red tape' ta un di e prioridadnan pa comercio por florece

ORANJESTAD (AAN): Minister Geoffrey Wever a laga sa cu den su combersacion cu directora Sra. Maria Dijkhoff-Pita, el a haya un splicacion amplio di kico tur e ekipo di DEZHI ta haciendo pa economia di Aruba.

            A toca varios tema cu lo bay haya atencion di Ministerio di Asuntonan Economico, Comunicacion y Desaroyo Sostenibel durante e proximo 4 añanan.

            Wever a keda contento pa wak e experticio y dedicacion di e ekipo di DEZHI. Tambe a menciona di ta sinti positivo sabiendo cu lo ta bay tin un bon cooperacion cu DEZHI pa por logra metanan comun cual sigur lo beneficia Aruba.

            Den e proximo 4 añanan lo enfoca riba implementacion di plan; convirtiendo ideanan den resultado concreto.

            "Elimina e red tape ta un di e prioridadnan pa comercio por florece, esaki lo ta un di e prome proyectonan pa ehecuta. E ta nos tarea pa crea un cuadro legal pa comercio por sigui haci negoshi na un forma agil y dinamico y tambe crea e cuadro legal cu ta necesario pa por diversifica nos economia y atrae e capital y experticio cu Aruba y su comerciantenan tin mester", Minister Wever a enfatisa.