AVP a sali como partido mas grandi
- AVP: 17.658 voto (9 Asiento)
- MEP: 17.332 voto (8 Asiento)
ORANJESTAD (AAN): Resultado di Eleccion 2024 tabata algo sin precedente. Un careda cabez-cabez a finaliza cu AVP como partido mas grandi, cu djis par di cien voto. Nan ta haya chens di core Parada di Victoria riba Diadomingo. Aruba lo bay haya otro Gobierno di Coalicion, y e biaha aki Partido FUTURO tin e yabi.
Den oranan di mainta e Stemlokaalnan tabata basta rustig, pero asina cu 11’or di a bati, multitud di hende a cuminza aglomera na e urnanan electoral pa participa na e actividad di democracia di Eleccion 2024. Tabatin conflicto hopi chikito na algun di nan, y tambe tension ora cu simpatizantenan di AVP y di MEP a confronta otro, pero a wordo resolvi cu presencia di Polis cu a yega.
Conteo a cuminza: Pa 7:00 pm tur stemlokaal a cera, y asina e proceso di conteo a cuminza. Poco prome cu 8:45 pm, e prome urnanan a cuminza drenta, specialmente e urnanan ambulante. Despues a cuminza drenta mas urna tras di otro. Ya pa 9:15 am, un total di 5 urna electoral a drenta. Pa 9:30 pm el a bira 9 urna.
Pa 10:10 pm, e cantidad di urna cu a raporta ta 16. Como 35 minuut despues, esta pa 10:45 pm a yega na 30 urna electoral. Pa 11:10 pm, el a yega na 40 urna cu a raporta. Pa 11:30 pm ya el a yega na 47 urna cu a raporta.
Knock-out di algun partido: For di trempan caba por a nota cu partido RAIZ a cay bastante cu ta indicacion cu pueblo a keda nada impresiona cu nan campaña, nan forma di actua den Parlamento, y nan ideologia y actitud anti-Taxista y nan no por a compronde cu e hecho cu Taxista na final ta pasa su vergunning pa un famia of amigo, y cu esey ta forma parti di un “pensioen” cu e placa cu genera. Pero RAIZ y su huristanan ta insisti cu esey ta corupcion, siendo cu e ta un gedogen beleid pa hopi decada.
Di trempan tambe a mira cu pueblo a duna Partido MAS un scop basta fuerte y a desaproba e forma cu drs. Marisol Tromp y Aguanette Gunn a hiba nan politica, nan comportacion den Parlamento, y riba Diabierna 6 di December, pueblo a laga nan cay “manera un moringa berde”. For di e 2 asiento cu nan a logra na Eleccion 2021, e biaha aki na 2024 nan a logra ni un solo asiento!
Di trempan tambe a nota cu e vlam di Miguel Mansur a paga completamente, y su Partido Accion21 a cuminza cu caida den cantidad di voto, y pa gran parti a ricibi menos di 20 voto na algun stemlokaal. Na final a nota cu Accion21 a logra ningun asiento, pues pa awor lo no mira Mansur mas den Parlamento.
Parlamentario independiente, drs. Ryçond Santos do Nascimento di Partido LpR tambe tabata basta debil den resultadonan, y a logra ni un asiento. Por lo pronto lo no bay mira su cara mas den Parlamento pues.
Debut impresionante: Partido FUTURO ta bira e ‘Rookie of the Year’, logrando no menos cu 3 asiento den su debut den mundo electoral di Aruba. Su lider Gerlien Croes a mustra di ta hopi orguyoso y ta contento cu nan mensahe di un politica nobo a wordo acepta pa comunidad.
E ta un demostracion tambe cu e trio di Gerlien Croes, Geoffrey Wever, y Gino Goeloe a sa di impacta den resultado.
Partido PPA tambe lo tey bek despues di basta decada un biaha mas den Parlamento. E ta resultado di un trabao inmenso cu e lider Otmar Oduber a haci den seis siman di tempo pa reaparece bek den Parlamento.
Eleccion aki a conoce un porcentahe halto di hende cu no a bay vota, pa colmo riba di 900 pico voto invalido. Con Gobierno nobo lo bay forma? E lo mester bay bira uno di Coalicion, y e tin di bay wordo dicidi den dianan venidero y Partido FUTURO tin e yabi di gobernacion.
