Resultado di eleccion 2021 a marca historia pa kiebra cu tradicion
*Democracia y un maneho firme den e tres nucleonan di Gobernacion
*Capitan Evelyn Wever-Croes y e mandato pa reposiciona rumbo Aruba
ORANJESTAD (AAN): Dia 25 di Juni 2021, Pueblo di Aruba mester a acudi na urna electoral den un eleccion, cu segun tradicion politico, mester a manda e gobierno saliente di Evelyn Wever-Croes cas.
Comn problemanan cu ta presenta nan mes, ta influencia e resultado electoral na un pais, a bira bisto na Aruba na 1985, ora e luchador y e politico cu a logra Status Aparte di Aruba, Betico Croes, a wordo derota pa motibo di ciere di Lago y e medidanan cu e pais mester a tuma pa sobrevivi.
Ciere di Lago a cambia e lucha genuino di Aruba, cu a dicidi pa un futuro den cual e fundeshi financiero di Aruba a wordo sacrifica y e pais a wordo cubri cu debe, cu te awe e mester paga.
Ciere di Lago, anuncia na momento cu Aruba tabata uni den e logro grandi di Betico Croes cu a entrega Aruba autonomia, a bolbe den memoria di e Arubano na 2020, ora Aruba cu sacrificio grandi na man di e prome Gabinete Evelyn Wever-Croes, a logra habri caminda pa un futuro nobo a base di un maneho realistico di Prome Ministro mr. Evelyn Wever-Croes.
Despues cu promesanan falso di entrada di un refineria den cooperacion cu Nicolas Maduro, cu mundo tabata rechasa, na 2017 Pueblo di Aruba a dicidi pa cambio di e base di gobernacion y a scoge pa mr. Evelyn Wever-Croes cu no a priminti Aruba un hardin di rosa, pero logro a base di sacrificio pa asina recupera Aruba, cu Gobierno Mike Eman a laga atras den estado bancarota.
Na 2020, Aruba a alcansa su prome presupuesto cu a cera cu un saldo positivo y tabata exigi continuacion di e maneho di Gabinete Wever-Croes, mundo a wordo ataca pa e Pandemia Covid-19 cu a exigi ciere di economia di Aruba.
E base di produccion di entrada pa henter Aruba a wordo kibra dor di Covid-19, cu a exigi un prestamo di Aruba, mescos cu tabata e caso na tur pais na mundo, pa por a sobrevivi.
Den e situacion aki, e peso di e pago di debe cu gobierno Mike Eman a laga atras hunto cu e monstruo financiero di proyectonan Bo Aruba, Gobierno Wever-Croes a duna Aruba aliento y cu perseveransa Aruba a sigui cana pa alcansa eleccion 2021.
Ora eleccion 2021 tabata acerca, Mike Eman cu a bay sconde despues di e caos financiero cu el a laga atras, a bolbe presenta riba plataforma di Aruba, pa lanza su mes atrobe como candidato pa e puesto di Prome Ministro.
E resultado di eleccion cu a tuma lugar na Aruba dia 25 di Juni 2021, a duna prueba cu Aruba no a ripiti su modus operandi di eleccion 1985 cu a deshaci di Betico Croes como e lider di Status Aparte.
Pueblo di Aruba a entrega na e momentonan politicamente mas dificil, e encargo pa sigui nabega e barco Aruba y reposiciona e rumbo di e pais.
Na Juni 2025, Aruba mester bolbe na urna electoral.
Un Aruba completamente diferente na 2021, ta na porta di campaña electoral 2025. Un pais cu a bira un modelo di bon gobernacion pa Reino Hulandes y pa henter mundo a base di e maneho firme di Gabinete Evelyn Wever-Croes na e momentonan mas dificil cu mundo a conoce for di final di Segundo Guera Mundial.
Un Aruba cu un economia solido, un situacion financiero cu saldo positivo, cu adelanto continuo ta loke awe mester atende cu mundo riba tur tereno.
Den Corte di Husticia prueba ta wordo duna cu e Caso Avestruz, cu Husticia ta conta pa e gobernante cu no cumpli cu su tarea pero bay contra bienestar di e pais.
E mayoria den Parlamento di Aruba ta sigui traha riba e base solido financiero cu ta garantisa porvenir mientras e ala ehecutivo di gobernacion di Aruba, Gabinete Wever-Croes diariamente ta produci proyecto tras proyecto pa tur bario na Aruba.
Porfin San Nicolas ta haya su reconocemento, mescos cu tur otro parti di Aruba caminda speransa nobo ta yena aire y hasta Reino ta busca inspiracion y mester mara su critica na honestidad.
E rumbo di Aruba a wordo reposiciona dor di Gabinete Wever-Croes 2, cu ta entrega Aruba e aliento pa sigui cana den un futuro cu sucesonan internacional ta haci dificil, pero den cual un Aruba luchador ta canta triunfo den e cambionan positivo bisti pa ciudadanonan di tur edad, tur posicion, tur credo manera e base constitucional democratico ta exigi.
Bario pa bario DIARIO lo bay splica pa duna prueba di adelanto cu Aruba a conoce ariba tur tereno di democracia, cu ta honra bon trabou y ta castiga loke ta contra bienestar di e pais!
