ORANJESTAD (AAN)- Den su reaccion tocante e conferencianan di prensa cu ta wordo duna door di famia di e mucha muhe cu a causa e accidente fatal door di Hit & Run,
dilanti entrada na Renaissance Mall, causando morto di su mayornan, Edwin Willems ta sigui expresa cu e ta gradici Ministerio Publico (OM) pa su tremendo investigacion, y e fiscal cu ta haciendo un trabao corecto y cu esaki ta un les pa comunidad, cu Aruba lo no tolera mas Hit & Run.
“Hende inocente no por sigui paga mas pa hendenan iresponsabel, sin consenshi, lagando famianan den dolor y comunidad den shock.
Nos ta boga pa husticia, nan no kier, nan kier sigui mata hende y sali den dos dia. Mi ta pensa si e lo tabata viceversa, si el a pasa cu nan mama of algun di nan sernan keri, e ora ey si nan lo tabata full di otro banda, pero manera mi a bisa anteriormente, mi sa cu hopi media ta draai via sponsor, y nos sa cual ta e sponsor di e media cu a bin papia tur e cosnan aki, cu a dirigi tur e mal informacionnan aki, dus nos sa kico ta kico.
Nos no ta contento di locual cu a pasa, pero nos mester ta contento cu pa prome biaha den historia un hende cu a ocasiona y Hit & Run, ta bay wordo sentencia pa intento di asesinato, y asesinato. Nunca nos tabata tin’e den historia”, Edwin Willems a declara.
El a bisa cu tin hopi victima di Hit & Run cu nan famia a haya bofta den nan cara, y tin hopi caso unda esnan culpable despues di dos of tres luna a sali liber. “Nos no kier esey mas pa Aruba. Lamentando e caso aki y otro casonan cu a sosode, locual cu nos ta contento ta cu por fin, aki na aruba, por bin husticia pa e bagamunderia aki por caba”, Edwin Willems. yiu homber di e victimanan, a declara den conferencia di prensa.
