Educadornan grupal na Centro Orthopedagogico Aruba a participa den un curso hopi interesante  

Miozottis Nuñez-Maldonado:

ORANJESTAD (AAN) – Miozottis Nuñez- Maldonado, educador grupal (Groepsopvoeder) na Centro Orthopedagogico Aruba, den entrevista cu DIARIO a splica cu e curso cu nan a caba di haya, ta uno hopi interesante, cu a dun'e hopi herment pa e trabao cu e ta realiza, pero tambe pa locual lo wordo implementa den futuro.

            Den e curso nan a haya conocimento tocante kico ta e necesidad, mirando cu hopi biaha den separacion di pareha, e enfoke ta wordo haci riba e dos adultonan pero ta perde enfoke riba e yiunan, cu eigenlijk ta hunga un rol hopi importante.

            Miozottis a splica cu nan ta traha cu muchanan cu ta wordo saca for di cas, pa un of otro situacion, y nan ta ripara hopi cu e cosnan ta cuminza bay fout na momento cu tin separacion di e pareha, y no ta pone atencion na e muchanan.

            El a bisa cu aworaki cu ta bay implementa, cu mayornan tin cu para keto un rato y laga nan diferencia un banda, y enfoca riba e menornan di edad, e ta bay trece hopi cambio pa cu esaki.

            Machismo ta hunga un rol den sentido cu hopi biaha ta laga e educacion di e yiunan den mannan di e mama so. Y hopi biaha e gastonan tambe. Pues, e mama ta tuma e rol hopi mas over, na momento cu ta yega na menornan di edad.

            Ora cu lo implementa cu tin cu trece e tata acerca, e lo crea un balansa cu aunke e mayornan no ta hunto mas, na final di dia semper nan ta keda e mayornan di e menornan di edad, y nan ta bay refleha como mayor y kico ta nan obligacion pa semper cu nan yiunan.