Wikipedia na Aruba
ORANJESTAD (AAN): Wikipedia na Aruba ta anuncia e ultimo actividad di e proyecto piloto Wikimedian den residencia: e delaster Wikipedia edit-a-thon titula “Wikipedia: Artistanan di Aruba”, cu lo tuma lugar riba dialuna 22 di Juni 2026 na Biblioteca Nacional Aruba (BNA), Arubiana-Caribiana.
E evento aki, ta parti di e encuentronan di Ban Wiki na unda participantenan por contribui na crea articulonan nobo, mehora contenido existente y haci conocemento tocante Aruba mas accesibel riba pap.wikipedia. E ultimo edit-a-thon ta habri pa publico y no mester tin experiencia pa participa. Tur participante lo ricibi guia paso pa paso riba con pa contribui na Wikipedia.
E iniciativa ta parti di esfuerso continuo pa fortalece presencia di contenido na Papiamento y tocante Aruba riba plataformanan di Wikimedia, asegurando cu conocemento local y cultura ta wordo preserva y comparti mundialmente.
Aunke e evento aki ta marca e final di e proyecto piloto, material educativo ta keda disponibel pa publico. Esaki ta inclui video di instruccion disponibel via canal di YouTube di Wikipedia na Aruba, tambe guianan practico pa yuda engrandece conocemento di boluntarionan nobo.
Detaye di e evento:
- Evento: Ban Wiki! Edit-a-thon – “Wikipedia: Artistanan di Aruba”
- Fecha: Dialuna, 22 di Juni 2026
- Luga: Biblioteca Nacional Aruba (BNA), Arubiana-Caribiana
- Organisa pa: Wikipedia na Aruba
- Registracion: (no ta necesario) Bin na ora si!
