Mercedes Bruyn di AWA:
ORANJESTAD (AAN): Animal Welfare Alliance Aruba Foundation (AWA) ta haciendo un yamada urgente na comunidad pa sigui apoya e campañanan di sterilisacion gratis di cacho y pushi cu ta tuma luga durante e ultimo dianan di juni y prome dianan di juli. Segun Mercedes Bruyn di AWA, aunque hopi progreso a wordo logra durante e ultimo añanan, Aruba ainda ta enfrenta un problema serio di sobrepoblacion di animalnan.
Actualmente AWA ta trahando hunto cu Crossroads Animal Aid y teamnan internacional di Mexico y Merca, loke ta permiti cu mas proceduranan di sterilisacion por wordo realisa cada dia. Pa e motibo ey, e organisacion ta pidi publico pa no warda y provecha e oportunidad pa trece mascota of reporta colonia di pushi y grupo grandi di cacho cu mester atencion.
“Nos por sterilisa ainda mas animal pa dia.E servicio ta gratis. Esey ta precisamente loke nos ta buscando. Si bo ta mira hopi pushi of cacho den un area, reporta esaki na nos. Si bo tin un mascota cu ainda no ta sterilisa, trece,” Bruyn a enfatisa.
Segun AWA, sterilisacion ta un instrumento importante pa evita cu e cantidad di cacho y pushi riba caya sigui aumenta. Sinembargo, Bruyn ta destaca cu e solucion no ta limita solamente na esterilisacion. E ta enfatisa cu Aruba mester sigui invirti den educacion, conscientisacion y responsabilidad como doño di mascota.
“Nos no por considera normal cu animalnan ta sufri riba nos cayanan. Bienestar di animal mester bira un responsabilidad comparti entre comunidad, doñonan y autoridadnan,” Bruyn a declara.
Segun e, e problema ta creciendo constantemente y mester wordo ataca for di diferente angulo. “Fundacionnan no por haci esaki nan so. Comunidad mester yuda y gobierno tambe tin un rol importante den crea consciencia y sostene iniciativanan cu ta contribui na un solucion duradero.”
AWA ta informa cu tin campañanan andando durante e ultimo dianan di juni y e prome dianan di juli, specificamente riba dialuna, diamars, diahuebs y diabierna.
Personanan cu kier registra un mascota, reporta un situacion of busca informacion tocante transporte por comunica via WhatsApp na 5938390. Tambe tin posibilidad pa bishita e clinica na Tanki Leendert 132C pa informacion adicional.
Señora Bruyn ta conclui cu un mensahe cla: “Cada sterilisacion ta un paso dilanti pa reduci sufrimento, controla sobrepoblacion y crea un Aruba mas responsabel pa su animalnan.”
