Director di Aduana Aruba Roderick Croes:
ORANJESTAD (AAN): Departamento di Aduana Aruba pronto lo muda pa su edificio nobo na Barcadera, cu actualmente ta bou di construccion. E edificio nobo lo ofrece un espacio mas adecua pa Douane, tanto pa traha como pa brinda un servicio mas profesional y eficiente.
Director di Douane, Roderick Croes, den entrevista cu DIARIO a indica cu e mudansa aki no ta solamente fisico, sino tambe strategico. Douane lo modernisa tanto su infrastructura como su manera di traha, haciendo uzo di medionan y tecnologia moderno pa optimalisa procesonan y haci e trabou mas eficiente y efectivo.
Segun Croes, e edificio nobo no tin relacion directo cu cambionan den control; e control actual lo keda intacto. E enfoke principal ta pa mehora e ambiente di trabou y fortalece operacionnan interno y brinda miho servicio. Pero si el a menciona cu den futuro cercano, tin plannan pa crea un espacio tras di e edificio nobo pa haci control. E paso aki lo implica un adaptacion chikito den e proceso di control.
Croes a confirma cu e construccion ta progresando bon, aunke tin un retraso chikito di casi dos luna. Originalmente a proyecta pa completa e edificio na Juni proximo, pero awor ta spera cu lo por drenta entre September y October.
Cu excepcion di e division di cargo na aeropuerto y na Barcadera, tur otro departamento di Douane lo bin den e edificio nobo, centralisando trabou y operacionnan bou di un mesun dak.
