Oriana Wouters ta splica:
- Tur tin cu percura cu derechonan fundamental ta proteha y respeta
ORANJESTAD (AAN): Durante su presentacion den e ultimo IPKO cu a tuma luga na Aruba, señora Oriana Wouters, un activista di clima y representante di e Grupo di Clima y Husticia Social Caribe Hulandes, a trece diferente punto relaciona cu adaptacion na clima. El a enfatisa cu e aspecto di adaptacion na clima no solamente ta un cuestion di Hulanda, pero di henter Reino Hulandes.
Wouters a enfoca riba e caso di Bonaire na unda cu corte a determina cu Hulanda ta discrimina maneho contra di cambio di clima na Bonaire. Esaki supuestamente pasobra ya e maneho ta estableci na Hulanda. Oriana Wouters a demostra e parlamentarionan presente, cu articulonan den statuut (waarborgfuncties) ta indica cu den aspectonan di clima, henter Reino tin su responsabilidad pa carga y pa percura cu derechonan fundamental di e personanan riba e islanan di Reino y na Hulanda ta wordo proteha y respeta.
Un otro punto cu el a menciona ta cu tin actividadnan recien cu a pasa den islanan di Reino cu sosten di Hulanda entre otro accionnan di ‘The International Panel on Deltas and Coastal Areas (IPDC)’ cu a yuda e paisnan den Reino wak nan scenarionan climatico y a yuda nan crea plannan di implementacion. Segun Wouters, ta yegando e momento na unda cu tur pais mester crea nan plan di adaptacion pa clima.
Sinembargo, el a menciona, ta conoci cu tin falta di fondo pa sigui e sosten tecnico. E ora, segun señora Wouters, ta Reino mester percura pa esaki tuma luga pa motibo cu e ta un actividad cu ta den nomber di resiliencia climatico.
Banda di esaki, e islanan tin un posicion special den e convenio di cambio di clima, entre otro un fondo pa perdida y daño, y otro fondonan pa adaptacion cu nos islanan no tin acceso na dje pasobra e islanan no a firma e convenio mientras cu Hulanda a firma. Y door di e posicion cu e islanan tin den Reino, ta haci cu mester depende mas riba Hulanda pa percura cu tin accionnan di clima na e islanan.
Un otro punto cu Wouters a enfoca riba dje durante IPKO tabata tocante e acceso na e fondonan mes. El a menciona cu tin structuranan caba cu proyectonan local por haya fondonan di Hulanda, e Rijkscultuurfondsen, cu ta enfoca riba cultura. El a subraya cu door cu clima ta toca tur sector, por haci cu accionnan climatico ta proteha herencia cultural y herencia natural di cultura.
Segun Wouters, e no ta rekeri hopi di e parlamentarionan Hulandes pa traha un amienda chikito den e ley di Rijkscultuurfonds pa asina por lo menos cuminsa haci e fondonan aki disponibel pa accionnan climatico tambe caminda cu organizacionnan local por efectua e proyectonan aki segun nan propio capacidad pa crea e proyectonan segun e identidad di cada isla.
