Edificio historico di aña 1800 ta wordo restaura den centro di Oranjestad

Anna Catharina Building:

ORANJESTAD (AAN): Den e dianan aki por a tuma nota di un desaroyo interesante cu ta tumando lugar den centro di ciudad. Combersando cu un di e desaroyadonan, DIARIO a haya sa cu esaki ta trata di e restauracion di un edificio historico cu ta data di aña 1800, esta Anna Catharina Building.

            E edificio ta situa den curason di Caya Grandi. Ta trata di un cas cu originalmente a pertenece na famia Tromp, y cu a sirbi di hogar pa Hermina Matthea Tromp y su cinco rumannan.

            DIARIO a haya sa mas di e historia di e cas aki y su prome habitantenan.

            Anna Catharina, tabata cabes di e famia y el a kibra cu e normanan di su epoca, unda yiunan homber tabata hereda negoshinan. Aunke e sociedad lo a sugeri pa duna e negoshi familiar na un homber, Anna Catharina a reconoce e capacidad di su yiu mayor, Hermina Matthea, un hende muhe cu sabiduria y vision.

            Desafiando e tradicion, el a pasa e liderazgo di e negoshi na su yiu, mustrando cu liderazgo no ta di sexo, sino di habilidad y forsa. Pa honra e decision balente aki, e edificio a haya e nomber di 'Anna Catharina". E simbolo aki lo honra tanto e pasado como e futuro, representando resiliencia y progreso, mientras cu su historia ta recorda nos cu berdadero liderazgo ta basa riba decisionnan cu ta desafia e status quo.

            Teniendo den consideracion e historia interesante aki, DIARIO a haya informacion cu despues cu e edificio den e añanan mas recien tabata funcional comercialmente, awendia e edificio ta wordo restaura pa asina duna un bida nobo na su historia.

            E desaroyado a duna di conoce cu e restauracion ta balora den 1 miyon dollar y lo bira un espacio pa alberga 6 tienda y un restaurant cu lo yuda revitalisa Caya Grandi.

            Riba combinacion di potret por aprecia con e restauracion ta tumando lugar lagando tambe evidencia di e transcurso di e añanan y e fundeshinan cu ta parti di e historia di Aruba.