Economia lo crece y surpasa 8 biyon florin den 2026

Minister Geoffrey Wever:

ORANJESTAD (AAN): Minister di Finansa, Asunto Economico y Sector Primario mr. Geoffrey Wever ta informa cu e ultimo proyeccion pa Aruba su economia den 2026 ta positivo. Departamento di Asuntonan Economico, Comercio y Industria (DEACI)su "Economic Outlook May 2026 – 2027" ta contene un ahustacion di e crecemento economico pa 2025 y tambe ta duna un proyeccion pa 2026 y 2027. E ultimo ahustacion y proyeccion ta basa riba informacion disponibel te cu 2 di maart 2026 riba nos economia.

Informacion oficial y publico pa 2025 riba e cantidad di bishitante, y cantidad di empleo ta mustra un crecemento mas cu a wordo proyecta anteriormente. Segun Aruba Tourism Authority, e cantidad di bishitante “stay-over visitors” a crece di 1.4 miyon pa 1,5 miyon den 2025 cu ta igual cu un crecemento di 7 porciento compara cu 2024.

Datonan di SVb ta mustra cu den 2025 cu e cantidadnan di relacionnan di trabao a crece cu mas di 3 mil of 4 porciento compara cu 2024. Ademas, e ahuste di tarifa di inkomstenbelasting pa 0 porciento riba entrada na luna di januari 2025 ta estima di contribui cu aproximadamente cu Afl. 46 miyon florin na consumo priva. Ademas,  e suma di Afl. 250 extra na reparatietoeslag tur luna desde 1 di  mei 2025 na casi 22 mil pensionado ta estima na un entrada disponibel di Afl. 5.4 miyon florin pa luna of Afl. 44 miyon florin extra di mei pa december 2025.

Basa riba e informacion oficial y publico, DEACI ta haci un ahustacion di 5.9 porciento pa 6.4 porciento pa e crecemento di Aruba su economia pa 2025 den termino nominal. Esaki ta nifica ahustacion di e producto interno bruto, e indicador pa midi actividad economico, di Afl 7,861 pa Afl. 7,978 miljard florin.

E crecemento positivo den 2025 ta premira pa continua den 2026 segun DEACI. Den DEACI su proyeccion den december 2025, a premira un crecemento di producto interno bruto den termino nominal di Afl. 7,861 pa Afl. 8,068 miljard florin of 2.6 porciento.

Den e “Economic Outlook May 2026” DEACI ta premira un crecemento di Afl. 7,978 pa Afl. 8,078 miljard florin of 1.3 porciento. DEACI ta premira un crecemento di 4.8 porciento den e cantidad di bishitante “stay-over”. Cifranan di ATA ta mustra cu te april 2026 e cantidad di bishita “stay-over” ta mustra un crecemento di 9.6 porciento.

Consumo priva ta premira di crece di Afl. 4,148 miljard florin den 2025 pa Afl. 4,274 miljard florin den 2026. Esaki ta igual na un crecemento di 3.0 porciento. Pa stimula poder di compra, desde januari 2026, e reparatietoeslag pa pensionadonan a subi cu Afl. 150 florin extra, pa un total di Afl. 600 florin pa luna. E uitkering di AOV a subi cu un promedio di 100 florin pa pensionado pa luna. Y e prima di seguro medico AZV pa pensionadonan cu un entrada anual te cu 30.000 florin a baha di 5 porciento pa 0 porciento.

Pa loke ta inversionan, DEACI ta premira un retraso den ehecucion di proyectonan di inversion. Den 2026 ta premira cu e balor di inversionnan lo yega Afl. 1.439 miljard florin compara cu Afl. 1.565 miljard den 2025.

Pa 2027, e expectativa ta positivo pa desaroyo di Aruba su economia. DEACI ta premira un crecemento nominal di 4.1 porciento pa yega na un balor di Afl. 8.408 miljard florin den 2027.

Pa mitiga e impacto di prijsnan di combustibel mas halto riba famia y negoshinan, e gobierno a introduci un reduccion strategico di accijns riba combustibel den april 2026. Inflacion a keda na un nivel hopi abou di 0.1 porciento den 2025. Pa 2026, inflacion ta wordo proyecta na 3.0 porciento, principalmente como resultado di e situacion den  Medio Oriente.

Como parti di monitor continuo, DEACI a compila tres scenario extra. Den e scenario “Longer Resolution”, ta premira si e conflicto actual na Medio- Oriente dura mas largo, e crecemento nominal di e producto interno bruto lo por yega na 0.8 porciento. Den caso di e scenario “Terror Attack” den cual ta asumi un shock den turismo, ta premira un caida di e producto interno bruto cu 2.9 porciento. Den e scenario "Stronger Tourism", den cual bishita crece mas cu a proyecta, crecemento nominal lo yega 1.9 porciento.

Compilacion di proyeccionnan economico ta posibel danki na uzo di e modelo macroeconomico MARUBA. E modelo MARUBA ta basa riba e Cuentanan Anual di Pais Aruba publica pa CBS y ta refleha e funcionamento di e economia di Aruba. Maneho di e modelo MARUBA ta cay bao responsabilidad di DEACI. E proyeccionnan economico ta posibel danki na e dialogo continuo cu diferente instancianan y expertonan local, y a base di analisis di diferente desaroyo. e Comision MacroModel ta reuni pa intercambio di informacion, analisis y evaluacionnan di e suposicionnan. Miembronan di e Comision MacroModel ta Directie Financien, Impuesto, ATA, AHATA, AAA, SVB, AZV, DAO, CBA y DEACI como voorzitter.

Ministerio di Finansa, Asunto Economico, y Sector Primario conhuntamento cu Departamento di Asuntonan Economico, Comercio y Industria lo sigui monitor desaroyo di economia di Aruba.

Minister Geoffrey Wever kier gradici directora Maria Dijkhoff-Pita y e afdeling Economisch Beleid en Onderzoek hunto cu Comision MacroModel cu ta haci e economic outlook posibel. Pa mas informacion riba e "Economic Outlook May 2026 – 2027" por bishita website di DEACI: www.deaci.aw