ORANJESTAD (AAN): Bo ta haya nan den mondi benta, riba acera, of para patras di garage di mecanico sin ningun speranza mas di core riba caya.
Tambe e lugar unda Polis ta warda autonan confisca, tambe ta yen di nan, aunke algun ta djis ainda como skelet, y yerba a tuma over tur cos. Hecho ta cu e autonan bieu aki ta haciendo e lugar bira mahos, y ta genera contaminacion visual y ambiental.
Bo ta haya algun di e skelet di autonan aki cu ta den estado avanza di deterioro, despues cu nan a wordo exponi na awacero, solor, y condicionnan climatico, lagando djis e chasis na bista di publico.
Pero cada auto abandona asina, tin un tipo di caso diferente. Den pasado tabatin campaña di Bureau City Inspector pa recoge auto bieu of abandona for di diferente distrito, pero esaki por socede solamente ora cu e doño legal di e auto a duna su aprobacion pa haci esey. Pues tin hopi propietario cu no kier haci e tramite aki pa libera su mes den e auto. Kizas nan ta pensa cu un dia nan por bin haya un cumprado ainda, y pesey ta lage atras ta keda acumula frusto.
Pero den hopi caso, e doñonan a muri y e tipo di proceso aki ta bira mas dificil pa por lanta e auto y bay cu ne pa un lugar cu ta acepta hero bieu.
E cantidad di autonan bieu, no ta djis refleha e falta di haci procesonan mas facil, sino tambe e impacto ambiental cu e chassisnan aki ta generando hunto. Ambientalistanan ta bisa cu e skelet di autonan aki no ta djis afecta e contaminacion visual, sino cu nan ta converti den berdadero criadero di raton y otro plaga cu por transmiti malesa, y nan ta encanta biba den e autonan bandona asina.
E persona cu tin nan benta rond di su cas, tin di realiza cu e ta trece peligro di malesa pa su mesun famia, of pa e bisiñanan eybanda. Pa autonan bieu, sigur tin di bay busca un solucion urgente pa evita cu nan ta keda benta den bista publico, riba tereno publico, y pa autoridad stop di keda sinta cu man cruza.
