Directie Natuur en Milieu:
ORANJESTAD (AAN): E tribon cabes di martiu ta haya su nomber pa e forma di su cabes. Na Ingles nan ta yam’e scalloped hammerhead (Sphyrna lewini) ta un especie di tribon di e famia Sphyrnidae. Diferente na e cabes di martiu ‘great hammerhead’ esun aki n’e parti dilanti di su cabes no ta stret sino ondula. E ta e mas comun di tur e tribonnan cabes di martiu. Ta hay’e rond mundo den awanan tropical te na un profundidad di 500 meter.
Su wowonan y buraco di nanishi ta na cada banda di su cabes. E sorto aki ta e mas chikito di e tribonnan cabes di martiu. E largura maximo registra pa e especie aki ta 4.3 meter y por pisa rond di 150 kilo. Su color ta shinishi, bruin of hasta poco berde y blanco parti abou. Su skelet ta traha di weso moli (kraakbeen), e mesun material cu ta forma e oreanan di hende. Tribonnan tin diferente tipo di hala, un riba su lomba, uno di pecho y un na su rabo cu ta yud’e nabega den awa.
E tribon cabes di martiu tin comportacion di migra. E tribon embra ta uza areanan na costa pa broei su yiunan, nan ta mustra di keda uza e mesun area na costa, awa poco hundo pa brinda e yiunan proteccion y cuminda den e fase di crecemento. E embra ta pari yiunan bibo 1 bes pa aña. E por haya entre 12 pa 41 yiu. E sorto aki ta conoci cu su inteligencia ta halto y e ta desplega un comportacion agresivo ora cu e mester gara cuminda. E forma di su cabes ta permiti e tribon pa hinca su cabes den e suela di lama y asina gara manta raynan cu ta landa na fondo di lama. E especie di tribon aki no ta parce di ta ataca y come otro, tampoco den periodonan di hamber. Nan ta come otro piscanan y tambe sardin, macrel, calamari y pulpo.
Den algun parti di e oceano Atlantico, nan poblacion a baha cu mas di 95% den e ultimo 30 añanan. E motibonan di e caida aki ta entre otro piscamento excesivo, demanda pa halanan di tiburon y tambe zeta di tribon cu ta traha di nan higra. E especie aki tin tendencia di aglomera den grupo grandi, locual ta haci nan captura masal mas facil.
E tribon cabes di martiu ta e prome especie di tribon proteha bou di e US Endangered Species Act na 2019. E tribon aki ta clasifica como criticamente na peliger riba e lista ‘redlist’ di IUCN. Estudionan y esfuerzo pa conservacion ta encera cu e areanan yama ‘nursery’ ta keda protegi pa asina garantisa e prome añanan di bida di e yiunan.
Den e area di cria aki nan tin siguridad y menos competencia pa alimenta nan mes prome cu nan bida den lama grandi. Otro esfuersonan ta encera prohibicion di pesca den algun area, manera na e parti west di e peninsula di Yucatán, durante e temporada di reproduccion.
