'Early Bird Special' pa di 5 edicion di Diabetes Run & Walk 2022

ORANJESTAD (AAN): Aruba Aloe y Botica di Servicio a uni forza pa e di 5 edicion di Diabetes Run & Walk 2022,

cu lo tuma lugar diadomingo 13 di November di 2022 y pa anima comunidad pa participa den e evento, nan a dicidi di organiza un 'Early Bird Special' te cu 30 di September 2022. Subway tambe ta bay uni na e 'Early Bird Special' como patrocinador principal di e kids run.

   E participantenan por registra via www.diabetesrunaruba.com, paga prome cu 30 di September y asina haya oportunidad di gana un di e Early Bird Special Prizes.

   Cu e evento aki, nan kier recauda fondonan pa yuda personanan cu diabetes den e isla pa haya mas acceso na cuido cu nan mester pa medio di programa PRISMA pa diabetes tipo 2 di Fundacion Diabetes Aruba. PRISMA ta un programa, specialmente pa personanan cu diabetes tipo 2, cu kier asumi control di nan salud, logra tin un mihor control di nan diabetes y preveni cualkier otro complicacion di salud. Pa haya mas informacion riba Fundacion Diabetes Aruba y programa PRISMA, bishita www.fdaruba.com.

   Diabetes ta un problema grave na Aruba, ya cu e porcentahe di personanan cu diabetes ta casi doble di e porcentahe di poblacion mundial cu tin diabetes. Mitad di tur pashent cu diabetes no sa mes cu nan tin e malesa y no ta haya e atencion medico necesario.

   Aruba Aloe, Botica di Servicio, Subway, hunto cu FDA, ta kere cu un estilo di bida saludable ta reduci e riesgo di un persona pa sufri di diabetes y por yuda reduci necesidad di remedinan, loke por yuda e pashent pa biba sin remedi of yuda e pashent pa controla su diabetes. Ademas, come sano, haci ehercicio y baha peso lo haci cu curpa reacciona di manera mas positivo na  insulina.

  Scan e QR code y subscribi pa nan newsletter pa haya mas detaye riba e di 5 edicion anual di Diabetes Run & Walk 2022.