E tram 'double decker' lo wordo converti den un 'events tram'

Carolina Rojas-Lacle di Arutram a duna di conoce: - ORANJESTAD (AAN): Diahuebs atardi, tabata tin un ceremonia special y durante di esaki a probecha pa anuncia kico ta bay bira e uzo nobo di e famoso tram.

Carolina Rojas-Lacle, Sales & Marketing Officer di Aruparking y Arutram a splica cu durante e evento aki a haci un 'sneak peek' di e proyecto cu cual nan ta bezig aworaki pa e tram.

   E intension ta pa haci di e tram (double decker) un 'events tram'. Kier crea un manera pa diversifica e mercado un rato pa asina trece bida bek den centro di ciudad.

Esaki ta algo cu Marlon Croes, director di DOW tambe a referi na dje recientemente unda el a bisa cu tabata deliberando riba e futuro di e tram.

Rojas-Lacle a sigui splica cu e idea ta pa trece tur sorto di evento den e tram aki manera fiesta, un proposal, un dinner, un bruid, etc. E tram tin un capacidad di 75 persona.

E intencion ta mas o menos den un luna of un luna mey lansa e proyecto aki oficialmente. Tin un team cu ta trahando duro riba e proyecto aki pa por logra algo 'great', el a expresa.

E tram aki lo core riba e mesun ruta. Lo acerca e turistanan como tambe e localnan cu ta gusta planea eventonan den dia of anochi, a declara.