E trabaonan necesario di mantencion na Elmar ta bay ta un reto grandi

Expertonan di MPR:

• E ta reto grandi pero e por wordo logra
• Compania lo usa su experticio pa mehora grid local 

ORANJESTAD (AAN): Diaranzon mainta Utilities Aruba a tene un conferencia di prensa, relaciona cu e problema cu tin cu coriente, unda cu bastante frecuentemente coriente ta bay a diferente caminda rond Aruba.

Director di Utilities Ton Rojer a splica cu e intencion semper ta pa Aruba tin un red di coriente confiable y pesey a dicidi di haci un investigacion, pa haya sa kico exactamente ta e problema.

E compania Mericano MPR ta bezig cu e investigacion y representante di e compania, Ingeniero Brian Curran despues di papia un tiki di e compania cu e aña aki ta celebrando su di 60 aña di existencia, a duna algun splicacion di locual a bin dilanti te ainda.

Segun Curran, durante ultimo simannan el a reuni cu diferente representante di Elmar pa haya sa mas di e problema di baymento di coriente  y kico Elmar ta haciendo pa drecha esaki.

“Nos ta haci uso di nos experticio y experiencia, pa yuda mehora e red di coriente y pa esaki bira un red confiable”, segun Curran.

Katherine Inge tambe di MPR a splica entre otro cu tin factornan externo y factornan interno door di cual coriente ta bay frecuentemente na Aruba.

E compania a compara data di añanan anterior cu data di 2024 pa wak si tin un patronchi inusual cu a causa coriente pa bay frecuentemente, mientras cu a investiga tambe e plan di mantencion di Elmar di 3 aña, cu tin e meta pa mehor confiabilidad di coriente riba nos isla.

Segun Inge, na 2024 e factornan externo a contribui te ainda cu 43% di e causa(bestia, vehiculo, balloon etc., mientras cu problemanan den e ekiponan di Elmar a contribui cu 46% na esaki.

El a splica cu na 2023 na Aruba alrededor di 10 biaha pa luna coriente tabata bay algun caminda y na 2024 esaki a keda practicamente mescos.

Inge a indica tambe cu na 2023 baymento di coriente tabata bastante mas causa pa e problemanan di ekipo, compara cu na 2024, unda cu coriente a bay casi mes tanto biaha door di factornan externo(no bao di control di Elmar), compara cu e factornan interno.

Segun e experto di MPR, el a nota si cu na 2024 e cantidad di biaha cu coriente a bay causa pa blas y fli tabata bastante mas cu na 2023, specialmente den e ultimo dos lunanan.

Spencer Paul di MPR a trece dilanti cu a investiga e strategia di mantencion di ekipo cu Elmar tin pa e proximo 3 añanan, cu tin como meta pa baha e cantidad di biaha cu coriente ta bay.

El a indica cu e fayonan di ekipo ta e motibo mas grandi pakico coriente ta bay frecuentemente na Aruba.

Segun Paul, ta importante pa e ekiponan ta accesible pa haci test, pa inspeccion y pa posible reemplazo.

“Mester tin un balans den un mantencion practico, e impacto cu esaki ta bay tin riba baymento di coriente y tambe e costo di haci mantencion”, segun Paul.

El a sigui bisa cu tin tambe algun biaha cu coriente a bay door di cabelnan bao di tera.

Segun Paul, e investigacion a mustra cu tin un tiki progreso pa loke ta e meta di mehoracion, pero e comienzo ta un tiki lento ainda.

Esaki ta mas tanto debi na falta di ekiponan y material pa haci e mantencion.

“Falta mas tanto progreso den e areanan di e transformadornan di stacion y e asina yama ‘switching equipment’, unda cu actualmente mantencion ta tumando lugar”.

Nos ta proyecta cu debi na e nivel abao di e inventario di e ekiponan aki, cu mas laat e aña aki progreso lo stagna, mientras cu ta warda riba ekipo y material nobo, segun Paul.

 Un di e retonan mas grandi den mehoracion ta cu ta bay ta trabaonan grandi pa Elmar, unda cu ta bay tin retonan entre otro pa loke ta e trahadornan pa haci e trabaonan.

Hopi esencial ta bay ta tambe e ekiponan y material necesario pa haci e proyecto uno exitoso.

Paul a indica cu mescos cu rond mundo e problema ta e demanda pa ekiponan ta mas grandi cu locual ta wordo ofreci.

Un di e conclusionnan di e expertonan di MPR ta cu e trabaonan di mantencion di ekipo di Elmar cu ta hopi necesario ta bay tin su retonan, pero cu dedicacion y bon planificacion esakinan ta bay por wordo logra.