DNM: Colebra y hende ta menasa principal pa e totekinan
ORANJESTAD (AAN): Directie Natuur en Milieu (DNM) a sigui informa comunidad datonan interesante tocante fauna di Aruba.
E biaha aki a toca e Toteki (Anolis lineatus) of tambe yama Waltaca, cu ta camufla hopi bon riba troncon di mata y piedranan cu ta den mesun tono di color cu su cuero.
E toteki macho por bira 18 centimeter largo incluyendo su rabo. Su color ta den tono bruin cu 2 strepi bruin scur na tur dos banda di su zijnan.
Riba su lomba ta mas bruin cla cu patronchinan poco cuadra. E toteki macho tin un kam/lele bou su garganta bunita oranje cu mancha preto den dje. Esaki e ta saca como su mecanismo di defensa ora cu e ta defende su teritorio. E ta saca e kam aki y ta sacudi su cabes ariba abou asina e kam ta bira mas visibel. E mesun movecion aki e ta haci tambe pa atrae e toteki embra.
E toteki embra ta pone webonan. E toteki ta pone solamente un webo cada biaha. Esakinan tin un casca suave color blanco. E totekinan ta come mas tanto insecto cu nan ta busca den mata. Esaki ta yuda pa controla populacion di insecto cu por invadi mata. Colebra y hende ta menasa principal pa e totekinan.
