WILLEMSTAD: Diasabra cu a pasa, esta 26 di Juli 2024, tabata un dia historico na Curaçao, ora cu nan a tene e prome casamento civil entre un pareha LGBT.
Exactamente dos siman despues di e sentencia di Corte Supremo na Den Haag, e pareha lebiana Danika y Melinda a bisa “sí” na otro, marcando un logro cu ta resultado di decada di lucha pa derecho igual. Rondona pa famia, amigo y coleganan, a celebra e dia historico aki.
Antes tabata imposibel pa nan (mescos hopi otro pareha), pa oficialmente consagra nan amor. E tabata manera nan relacion no tabata totalmente reconoci. Pero danki na e lucha legal cu e.o. Human Rights Caribbean (HRC) a hiba durante cuater aña, nan a por finalmente experencia e momento cu nan tabata sperando pa tanto tempo.
“Esaki ta un victoria pa amor, igualdad y husticia,” segun presidente di HRC, Janice Tjon Sien Kie a declara na Curaçao. “Esaki ta un paso importante pa dilanti pa nos comunidad y un señal pa resto di mundo cu amor no tin limitacion.”
E ceremonia tabata un evento intimo y emocionante. E yiunan di e pareha a fungi como testigo, un acto simbolico cu ta enfatisa e union di e famia. Nan nieta a hiba e renchi di casamento, un momento cu a toca tur cu tabata presente profundamente. Ademas, e cooperacion ricibi di Registro Civil hunto cu Cuerpo Policial ta di aplaudi.
E organizacion di e boda historico aki a bay sin ningun problema. Pero tambe den e preparacion, e departamento di Asuntonan Publico a traha profesional. Asina e sistema pa registra parehanan di mesun sexo a cuminsa traha inmediato y riba e dia mes e Oficial di Registro Civil, esta Sr. Nersicio a papia di curazon, y subraya e mensahe universal cu ‘amor ta amor’.
