Raiz di democracia ta e Estado di derecho cu ta Ley pa un y Ley pa tur!
*Decadencia actual di alma politico ta cuestiona existencia democracia
*Un estado di derecho real ta respeta Pueblo y institucionnan legal
ORANJESTAD (AAN) — Ora contempla e panorama politico actual di nos mundo, por nota cambionan cu ta haci cu politica tin e tendencia actualmente di bandona e rumbo cu ta base di su existencia.
Politica a wordo introduci como herment pa alcanza felicidad di Pueblo pa medio di un maneho den cual e politico ta bira un sirbidor, cu Pueblo ta tuma den su servicio pa percura pa tur loke ta base di e felicidad di hende, funciona manera mester ta.
Concenshi di un politico ta central den realizacionnan di e trabounan pa cual e ta wordo paga dor di Pueblo y tambe ta adkeri rango social, cu ta eleva su persona na cumbre social di un comunidad.
Ora observa sucesonan y desaroyonan na 2025, e pregunta grandi ta surgi si ainda por considera e sistema di goberna pa medio di eleccion como base democracia na nivel mundial.
E sistema democratico di gobernacion, a wordo introduci atravez di lucha pisa pa garantisa cu gobiernonan eligi pa Pueblo, no ta subi pedestal pa nan goberna pero hustamente ta entrega nan pedestal pa evita politica barata.
Actualmente sucesonan rond mundo ta entrega prueba, cu lidernan no ta realiza kico ta e felicidad di un Pueblo y mas y mas e cantidad di aplauso cu un politico ta ricibi pa motibo di su maniobranan, ta dicidi pa politica rond mundo.
E berdad mas grandi cu mundo politico ta expresa, ta e realidad cu cualkier momento guera por rementa.
Por yega na e conclusion real, cu miedo di gobernantenan pa muri, no a provoca un guera ainda.
Unda raiz di tur e problemanan ta? E pakete di felicidad cu politiconan ta entrega hende y ta completamnete contra loke semper a haci hende feliz.
E pakete di felicidad di politiconan, ta bini dilanti den nan propio aspiracion pa por sinta ariba trono cu nan no tin na cas pero cu Pueblo mester regala nan.
Pues pa politiconan e felicidad no ta, cu nan mes ta pone man na obra pa alcansa algo den bida cu trabou duro, pero mas bien yega na un puesto halto, bon paga cu placa di Pueblo, cu ta entrega nan e poder pa goberna y tene Pueblo contento cu un disfraz di felicidad.
Ora papia di democracia ta papia di un sistema legal, pues un situacion den cual pa cada paso di un ciudadano, ta a base di loke ley ta bisa y no loke kier probecha a base di ley.
Un Estado di Derecho, manera Aruba ta, no ta regla e pais segun indicacion di ruta derecho of izquierdo, pero a base di e palabra Derecho como e facilidadnan cu Ley ta entrega na ciudadanonan.
E base legal di Aruba y paisnan cu e sistema constitucional liber cu ta wordo yama democracia, no ta nifica eleccion como espectaculo den cual hende ta bira rey eligi.
Democracia ta dicidi kende ta maneha a base di e sistema defini, e pakete di exigencianan cu ta percura pa tur hende a base di nan trabou y nan esuferzonan honesto, por sirbi nan pais y asina comunidad. Na mes momento ta Ley ta dicidi kico ta bon y kico ta malo y con ta maneha e proceso aki.
Den transcurso di tempo moderno cu a crea mas facilidad pa superacion di hende y asina evita cu ta a base di tradicion paisnan ta wordo goberna dor di cierto hendenan, hustamente por mira con den sistemanan democratico, hende ta kibra baluartenan pa garantisa “Ley pa uno y Ley pa tur” cu ta keda e base di democracia.
Gobernacion democratico no ta mara na cara pero ta mara na loke ta bon pa Pueblo y con ta respeta leynan y no hunga cu leynan pa garantiza cu e placa di belasting di Pueblo no ta bira e fondonan obtenibel di politiconan na mando pa cumpra voto pa medio di loke Pueblo ta paga nan pa haci.
Mundo na e momentonan aki ta pasa den uno di su peor crisisnan den cual e show politico cu ta wordo entrega na Pueblo ta destrui e legitimidad real di democracia, cu ta permiti pa destrui otro pa alcansa loke bo kier.
Mundo a bira campo di bataya pa poder falso pasobra poder real ta sconde den ciudadanonan cu ta respeta ley pa asina asegura cu e leynan den cual bienestar di tur hende ta garantisa, por ta realnente e defensa mayor di hende contra corupcion.
Democracia real a base di leynan cu ta e unico nucleo di gobernacion real di e pais, no conoce interpretacion pero simplemente mester wordo sigui como punto central di tur regla di un comunidad cu ta paga un Gobierno pa haci e trabou diario a base di ley tambe pa asina husticia real wordo haci na Pueblo y gobernacion no bira un carnaval den cual Prins Carnaval ta ricibi e yabi di comunidad pa pone hende baila un rato, goza di fiesta pa despues bay cas den un condicion humano cu ta destrui e realidad di democracia cu ta basa ariba e valor y dignidad di hende como hende y no di votador cu mester aplaudi su lider.
Mundo ta den un situacion sumamente serio. Cyber, sin cara y identiad visual ta ataca na culminacion di e prueba grandi, cu democracia ta wordo transforma den e burla di defensa di humanidad!
Democracia mundialmente mester wordo restora cu casnan di familia y identidad di Pueblo como base y respet pa e sistema legal, cu ta regla tur aspecto di un comunidad sano den cual hende conoce felicidad, cu ta cuminsa cu respet y no cu mas y mas ambicion personal!
