Reina Wilhelmina ta bira Reina di Hulanda na un edad di 10 aña pero ta su mama Emma tabata encarga cu e Reinado pa 10 aña te cu 1898.
Reina Wilhelmina ta tuma posicion di Corona Hulandes na 1898 te cu 1948.
Na 1902 e Aña di La Reina ta bira un celebracion nacional na Hulanda y Reino Hulandes.
Cu e binida di Frerenan y Soeurnan Hulandes e influencia pa celebra Aña di La Reina na Aruba ta crece.
Ta celebra Aña di La Reina dia 31 di Augustus. Cada aña cu diferente evento.
Na 1921 ariba 31 di Augustus tabata tin un final di wega di futbol entre e club di Hercules y Wilhelmina. Hercules ta gana e partido 1-0.
Na final di e partido e Gezaghebber di e tempo ey ta gradici tur hende y ta anuncia na Hulandes:
“ Leve de Koningin, Leve de Koningin, Leve de Koningin!, na unda cu e publico ta responde: “ Leve de Koningin, Leve de Gezaghebber en “ Leve de Volksfeestcommissie”
Ta bon pa menciona cu un di e prome weganan di futbol cu a tuma lugar den Wilhelimina SportPark ( Guillermo P. Trinidad) a tuma lugar ariba Aña di la Reina 31 di Augustus 1931. Un partido entre seleccion di clubnan di Oranjestad y hungadornan di Refineria Eagle. Wilhelmina Sport Park no tabata completamente cla ainda.
Na Lago tambe trahadornan tabata organisa actividadnan deportivo ariba Aña di la Reina. Atraves di añanan competencia deportivo a continua den Lago Sport Park.
Clubnan deportivo y clubnan social tambe a cuminsa cu actividad di weganan popular, deportivo y social ariba Aña di La Reina tur ariba 31 di Augustus.
E anochi prome cu Aña di La Reina tabata tin un fakkeloptocht
Na school e muchanan mester a canta e Himno Nacional “Wilhelmus” y tabata conoci cu tabata tin aubade y parada dilanti cas di Gobernador ( Gezaghebber).Tabata tin desfile militar y desfile di gruponan deportivo.
Ta bon pa menciona cu durante e periodo aki Aña di La Reina NO tabata un dia oficial liber pero si e muchanan tabata liber di school.
Tambe anochi tabata tin un fiesta na honor di La Reina na cas di Gobernador.
Compila pa Roberto G. Croes
Nos Historia Nos Herencia
