Na final di careda Mark Rutte ta ricibi e regalo cu e merece
*Panico den Eleccion Hulandes cu ta acerca su momento decisivo
*Pais unico pais den Reino cu bon gobernacion ta wordo confirma
ORANJESTAD (AAN) — E loke por considera un technical knock out di Prome Ministro di Aruba, Evelyn Wever-Croes contra Gabinete Mark Rutte, ta na e momento cu partidonan politico Hulandes ta prepara pa bay urna electoral.]
Culminacion di e proceso cu ta e entrega oficial di listanan di candidatonan ta den porta y Mark Rutte lo no ta e nomber cu ta resona mas.
Lo por a spera cu Mark Rutte lo a trata pa su salida di politica, cu a kibra record di temporada mas largo den gobernacion, lo tabata mas honroso.
For di e eleccion cu a produci e ultimo Gabinete di Mark Rutte, sinembargo ya tabata conoci, cu problema serio ta den porta.
Manera DIARIO for di momento cu mundo politico na Den Haag a cuminsa trata na tira misil riba Gobierno di Aruba cu manesa di supervision contra Gabinete Wever-Croes, a splica ta trata aki di movecionnan politico pa e gobernantenan saliente trata pa no perde nan cara completamente den desaroyonan cu ta tuma lugar.
Na e momentonan aki plannan di Gobierno Mark Rutte pa e forma cu lo a gasta placa di Hulanda segun nan cifranan calcula pa e pais, ta wordo completamente cambia.
Esaki ta nifica cu Parlamento Hulandes a bisa no na e maneho cu Mark Rutte a prepara pa Hulanda y asina tambe Reino den futuro cercano.
Den e momentonan di derota, Gobierno Rutte a trata di manda misil contra Gobierno di Evelyn Wever-Croes cu mester a wordo forsa pa acepta supervision Hulandes despues cu el a duna prueba cu Aruba por hiba un maneho cu Mark Rutte mes no por a hiba.
E technical knock out den Reino sigur ta presente den e forma cu Prome Ministro di Aruba a enfrenta Hulanda cu berdad riba e situacion financiero di Aruba.
Informacionnan incorecto a wordo presenta na Parlamento Hulandes dor di Secretario di Estado, Alexandra van Huffelen.
Prome Ministro Wever-Croes cu razon a considera e informacionnan aki contra berdad, ya cu manera DIARIO cu prueba a presenta na Pueblo di Aruba, e maneho financiero di Gobierno Wever-Croes tabata di acuerdo cu bon gobernacion hasta guia pa Caft.
Den e reaccion di Prome Ministro Wever-Croes na informacionnan incorecto di Secretario di Estado Alexandra van Huffelen na Tweede Kamer Hulandes, Prome Ministro Evelyn Wever-Croes ta entrega e prueba di e forma incorecto cu Gobierno Mark Rutte ta atende cu Aruba.
Kico esaki ta nifica den Reino ta bira tema di informacionnan cu DIARIO a base di reglanan di Statuut y bon relacionnan den Reino cu Hulanda tambe mester respeta, lo presenta na Aruba pa Pueblo di Aruba den un situacion politico cu partidonan politico Hulandes den Gobierno, cu na su salida, obviamente ta perde cabez a base di e realidad politico nobo na Hulanda.
