Aruba tin bon profesional pa entrega garantia bienestar na Pueblo --- *Como isla cu poco habitante Aruba ta entrega calidad cosmopolitano --- *Nivel di Cuido Medico di Aruba ta factor determinante pa economia
ORANJESTAD (AAN) — Na varios ocasion DIARIO a mustra cu e situacion mundial nobo, ta exigi pa den tur sector entrega informacion comprendibel pa Pueblo na Aruba, cu a costumbra cu un nivel di bida cu poco isla di tamaño di Aruba conoce.
Cu Aruba tin basta trabou pa haci ainda y cu cada dia ta trece su propio preocupacion nobo, ta berdad. Mescos ta berdad cu mester aprecia loke tin y mira loke bishitantenan di paisnan grandi, ta mira.
Ora papia di Salud Publico mester traha un inventario realistico di loke Salud Publico na Aruba tin pa ofrece.
Awe nos kier uza persona di dokter Richard Raven, specialista di Garganta, Nanishi y Horea, como ehempel di e calidad cosmopolitano, di ciudad grandi, cu Aruba ta ofrece na su poblacion y na su bishitantenan.
DIARIO lo bay cuminsa uza cifra pa mustra kico islanan di grandura di Aruba, ta considera como base pa Salud Publico, cu mester percura tambe pa e cuido specialisa y profesional riba cada tereno.
E exigencianan di personal den Salud Publico ta duna prueba di e cantidad di profesional cu mester pa un sistema funciona pero hopi bez ya no ta wordo aprecia mas.
Na cuanto pais un comunidad di 100 Mil persona, por conta cu un dokter di cas den bario?
Cuanto ambulance cu personal specialisa pa lucha pa bida di hende te ora yega hospital, Aruba tin?
E palabra mas importante ta hende cu ta uni den e trabou pa lucha pa derecho democratico mas grandi di un hende, cu ta busca su salud.
Aruba por conta cu personal specialisa hoben di propio tera, cu ta bira un team pa lucha pa salud di e Arubiano den un situacion unico.
Tur e diferente expertonan cu un pais mester pa haya cuido medico na cas, ta practicamente presente na Aruba, pais natal di profesionalnan Arubano cu a studia den exterior manera dokter Richard Raven cu a studia den e region Latino Americano pero ta traha awe cu profesionalnan cu a studia na Merca, na Hulanda y otro paisnan y ta uni forsa na interes di e curazon di bienestar di ciudadanonan, cu ta salud.
Aruba a yega na e momento cu e mester inventarisa e tesoro grandi cu e tin, scucha tur e profesionalnan cu ta lucha cu alma y curpa pa no solamente alarga bida di hende, pero percura pa un calidad di bida cu hende merece como hende.
Sin duda dokter Richard Raven mescos cu otro muembronan di e Cuerpo di Medico, Paramedico, Tecniconan, trahadornan prepara na centronan di salud tin portanan habri na facilidadnan medico rond mundo, cu no ta soña sikiera di tin loke Aruba tin.
Salud Publico na Aruba, ta modelo pa e parti mas grandi di mundo.
Awe cu un team cosmopolitano, cu preparacion profesional na tanto pais na mundo, Aruba mester enfrenta un futuro di reto y mas reto pa ciencia medico.
