Lisanne Sambo-Gomez:
ORANJESTAD (AAN): E sesionnan di training ‘Ban Pa Bay’ organiza pa Departamento di Enseñansa a cuminza caba y cu ayudo di Realign Coaching Consultancy and Services e ayudo aki na studiantenan cu tin pensa di studia na Universidad di Aruba of studia den exterior ta bayendo bon.
Den un entrevista cu director di Realign Coaching Lisanne Sambo-Gomez, el a splica cu e tayernan ta hopi importante, pasobra cada studiante tin su propio preguntanan.
“Algo hopi crucial den enseñansa ta cu constantemente tin cambionan den diferente regla den exterior y na Aruba me”.
Pesey ta hopi importante pa keda up to date y wak kico mester wordo haci, mirando e diferente factornan cu ta bin acerca, specialmente si bo ta den examen klas, segun Sambo-Gomez.
El a sigui bisa cu dentro di algun siman e examennan ta cuminza, pues e studiantenan ta bay tin mucho cos den nan cabes.
Tur hende cu aplica pa Aruba Lening por participa na Ban Pa Bay, pa asina haya informacion importante riba por ehempel documentonan cu bo tin cu busca y entrega y tambe pa bo ta bon informa pa e decisionnan cu bo tin cu tuma na caminda ta bon basa.
Sambo-Gomez a indica cu Realign Coaching tin casi dos decada di experiencia den duna informacion y guia na studiantenan cu ta bay studia na diferente pais.
“Locual nos ta haci ta laga cada studiante wak nos tayernan y traha riba nan mesun plan cu ta specialmente pa su mes, pa e por prepara su mes mas mihor posibel”, segun e director di Realign Coaching.
