ORANJESTAD (AAN): E asina yama ‘Nationaal Instituut voor Budgetvoorlichting’ (Nibud) di Hulanda ta realisando un estudio pa haya un mihor comprension di e educacion financiero
y sosten cu mester pa residentenan di Aruba. Nibud ta un centro di conocemento y conseho ariba di e tereno di finanzas na cas.
Cu resultado di e estudio aki, Nibud kier mira si por haci uzo di nan conocemento y experiencia pa yuda personanan structuralmente cu asuntonan financiero.
Ultimo añanan Nibud a haci estudionan na e islanan Bonaire, St. Eustatius y Saba tocante desaroyo di e poder di compra y kico ta un entrada minimo aceptabel.
Den cuadro di estudio na Aruba, Nibud a realisa un bishita di trabao na Aruba. Durante e bishita di trabao a bishita diferente organizacion cu pa medio di nan trabao ta trata cu e tema aki.
131 Aruba tabata un di e organizacionan na Aruba cu a ricibi bishita di Nibud, pa asina nan por a haya un bista di e contactonan cu 131 Aruba por a ricibi for di mucha, hoben y adolescente na Aruba tocante e tema aki. Nubid a ser representa pa Marion Weijers y Karin Radstaak, y nan a ser ricibi door di e director di 131 Aruba, James Sneek.
Durante e bishita na 131 Aruba a elabora ariba e motibo di contactan cu 131 Aruba sa ricibi pa cu e tema di finanzas na cas. Tambe a trata e instrumentonan cu 131 Aruba ta haci uzo di dje pa asina duna e mucha, hoben, mayor y profesional informacion preventivo tocante diferente tema.
E representantenan di Nibud a keda satisfecho cu e informacion brinda y impresiona cu e trabao di 131 Aruba.
