E ta invita pueblo pa bira parti di e “stakeholder engagement process” Parke Marino

ORANJESTAD (AAN) – Señora Sietske Van der Wal, “Interim Manager Park”, di Parke Marino Aruba,

den conferencia di prensa cu a tuma lugar na Mangel Halto, cual ta un di e areanan di maneho di Parke Marino, a elabora tocante e asina yama “Stakeholder Engagement Process”, den cual e ta pidi pa tur hende na Aruba cuminza forma parti di dje.

Van der Wal a splica cu esaki ta un proceso consultivo, unda ta bay sinta cu e diferente stakeholders di Parke Marino, pa asina practicamente cada ciudadano por considera su mes un stakeholder di Parke Marino, den sentido cu, na un of otro manera, nos tur ta conecta cu lama.

El a subraya cu e proceso aki lo wordo intensiva tambe, y ya caba diferente reunion cu hende individual a tuma lugar, y mayoria di biaha a base di peticion. “Pero aworaki nos kier cuminza cu diferente sesion di anochinan informativo y pa esaki nos ta extende e invitacion pa registra. Pensando tambe riba e medidanan di Covid-19, keda pendiente pasobra nos no sa con e situacion ey lo sigui, pero nos ta pidi tur hende pa registra pa nos mantene tur hende informa tambe si mester bin algun cambio. Si nos no por topa cu hende den persona, nos mester bay pa un plataforma digital. Pues, asina nos ta keda adapta na loke ta posible”, Sietske van der Wal a indica.

Van der Wal a subraya cu Parke Marino kier keda brinda e mesun informacion na tur hende na Aruba, cu ta interesa of cu ta sinti su mes interesa na forma parti den e proceso aki.

Despues di e anochinan informativo lo haci sesionnan interactivo unda diferente stakeholder ta bin hunto, pa bin cu diferente resultado y tur cos hunto lo yega na un plan di maneho pa Parke Marino, pa e proximo cinco añanan. Banda di e sesionnan menciona, ya caba nos ta bay lanza e fin di siman aki, un encuesta pa tur hende yena pa duna nan opinion, vision pa Parke Marino, riba diferente aspecto. “Nos ta bay haci e preguntanan den e encuesta, anto mas informacion nos haya mucho miho nos por tene cuenta cu tur esaki. Si nos no tin e informacion nos no por tene cuenta cune tampoco. Pues, por fabor vocifera bo opinion pa asina nos por tene cuenta cu esaki”, Sielske van der Wal a remarca.

El a agrega cu despues di e encuesta y e anochinan informativo nan ta bay organiza tayernan di trabao. Esakinan ta encera tur e aspectonan tanto fuerte como debil, y aspectonan cu ta brinda diferente oportunidad pa futuro, of e peligro y menazanan cu nos tin pa nos areanan marino, specialmente pa e naturaleza. Esey Parke Marino ta evalua pasobra mester tene cuenta cune: “unda nos mester bay cu Parke Marino pa nos por proteha nos naturaleza mientras tanto tambe, tene cuenta cu e aspectonan social y economico cu nos tur ta depende di dje y nos lama”, Sietske van der Wal a señala. Despues di e spot y analisis tur e informacion lo wordo compila tambe y lo bin otro sesion unda ta bay sinta cu diferente stakeholder, y e stakeholders mes, entre nan, por bay delibera kico ta e miho manera cu por yena zona den cada area di maneho. Por ehemplo unda si y unda no por haci cierto actividad, pasobra nan no a yena esaki ainda y no kier influencia e proceso aki tampoco door di menciona diferente actividad.