ORANJESTAD (AAN)- E siman aki ta tuma luga e di 31 edicion di e Conferencia Annual di Turismo (CATA).
Esaki ta un conferencia anual dirigi riba e mercado latinoamericano y ta un di e conferencianan mas importante pa cu Aruba su turismo procedente for di Latino America. CATA su obhetivo, pa 31 aña caba, ta pa brinda posibilidad pa reforsa e conocimento di Aruba na e ehecutivonan y pa sigui traha riba e relacionnan cu e socionan, enfocando asina riba oportunidadnan cu por enrikece nos mercado turistico. Debi na e situacion actual, CATA ta wordo teni digital.
Tin diferente orador cu lo toca un variedad di tema. Esaki entre otro ta:
Nicolás Marin di Argentina cu ta un fotografo pa Nat Geo y tambe un ambientalista. E lo toca e tema: “Turismo sostenible: Desde la tierra hasta el fondo del océano.” Despues ta sigui Álvaro Sepúlveda, CEO di Media Trends situa na Chile y Miami cu su tema “Creators Economy y el futuro del e-commerce es livestreaming”.
Desde Miami, Claudia Tellez ta directora comercial pa Latinoamerica di e conocido plataforma Kayak y su topico ta “Innovacion durante tiempos retadores.”
For di Mexico, Alan Estrada ta e creador di ‘Contenidos de Alan por el mundo’ y lo bay papia di “Generación de contenidos a través de terceros y su impacto en la industria de viajes.” Como ultimo orador, situa na Colombia, Dr. Santiago Rojas ta e conductor di e programa radial ‘Sanamente’ na Radio Caracol cu lo trece su punto di bista cu e tema “El futuro del bienestar enfocado a los viajes.”
For di Aruba Tourism Authority, e oradornan ta CEO Ronella Croes – CMO Sanju Luidens-Daryanani y directora di Latinoamerica Miriam Dabian.
Anualmente tin participacion di diferente pais manera Argentina – Brazil – Chile – Colombia - Costa Rica – Ecuador – Mexico – Hulanda – Panama – Paraguay – Peru – Spaña – Merca – Uruguay y Venezuela. Pa CATA 2021 tin mas cu 1000 participante registra.
Pa mas informacion of si bo ta interesa y ta desea pa participa por bishita e website cata.aruba.com.
