ORANJESTAD (AAN) – Den conferencia di prensa di gobierno di Dialuna, Minister di Enseñanza Endy Croes, a bolbe toca e tema di OAA (Openbare Avondleergangen Aruba) cu e mandatario ta treciendo dilanti for di dos siman pasa.
Minister Endy Croes a menciona cu siman pasa e mester a haya un rapport di un investigacion profundo cu a tuma lugar, unda a involucra tur stakeholders den e area aki, tambe cu Inspeccion y Direccion di Enseñanza.
No obstante, e rapport no a wordo concretiza siman pasa pero e minister a haya informacion cu e siman aki si e ta keda cla, y e rapport lo yega na e bureau di Minister y e ora ey hunto cu expertonan lo analiza esaki pa tuma e miho decisionnan. “Mi kier pa tin trankilidad den e veld aki tambe. Nos a sinti cu tin falta di evaluacion den educacion pa esaki por cuminza. E ta bay cuminza den un structura nobo y e fecha lo wordo anuncia asina e rapport ta cla, y decisionnan wordo tuma”.
E dignatario a bisa cu tur decision cu wordo tuma ta na bienestar general tambe, pa esnan cu tin cu sigui e opleiding pero tambe pa e docentenan, structuralmente, pa esaki por ta sostenible. E dignatario ta pidi esnan den veld un tiki mas di pasenshi, tin hopi pregunta ta yega cerca dje y tin su atencion y lo wordo resolvi mescos cu otro problemanan cu a ser soluciona caba, di manera structural.
