ORANJESTAD (AAN): Esaki lo bay ta un siman druk pa DOW, construyendo algun verkeersplateau riba cayanan unda chauffeurnan no ta preocupa cu velocidad. Pesey awor e “sleeping police” ta wordo instala.
Cuminsando Diaranson 2 di October 2024, nan lo bay traha 3 verkeersplateau. E prome ta awe Diaranson mes, unda lo pone un verkeersplateau na altura di Solito #78 manera por mira riba e potret aki.
Tambe riba Diahuebs 3 di October 2024, lo traha un verkeersplateau na altura di Appelsinastraat #38 y riba Diabierna 4 di October 2024, lo traha un verkeersplateau na altura di Fiyostraat #15. E orario di trabou lo di 8:30 mainta te 4'or di atardi. Ruta di desviacion lo keda indica cu borchi ta baricada di aviso. Chauffeurnan ta ser pidi pa tene cuenta.
