Magaly Brito Secretario General SEPPA:
ORANJESTAD (AAN) Magaly Brito, Secretario General di Sindicato di Trahadornan Publico y Priva (SEPPA), a splica den entrevista cu DIARIO cu tin 2.8 miyon florin destina pa e discusion cu tin rond di Indexering.
Brito a indica cu locual SEPPA a pidi tur stichtingnan ta pa calcula cuanto e ta sali aworaki pa ahusta salarionan, cu e 6% pa 2024, anto pa manda esaki hopi lihe y pidie como subsidio extra, p’asina nan por pidi ahuste di salario, y na mes momento, mirando cu SEPPA a tuma nota cu a wordo bisa cu ta solamente pa 2024, e ta un posicion cu e Sindicato no ta compronde, no ta di acuerdo cu ne, pasobra e sa cu presupuesto 2025 tey caba.
Y di otro banda, Brito a bisa, pa pone e fundacionnan aworaki den un presion pa bay resolve nan problema na Januari 2025, sabiendo cu nan sa caba cu no tin placa pa servicio, material, cu gastonan di funcionamento diario ta subi, ta imposible pa e fundacionnan por cumpli sin mas, na Januari 2025, cu ahuste di 57. Esaki ta algo cu SEPPA ta condena, y nan lo dirigi un carta na gobierno pasobra atrobe e tema di “output subsidie" cu como gobierno abo a bin cu ne, y a hinca e fundacionnan den e situacion aki, sabiendo cu nan tin nan compromiso caba estableci y cu mester cumpli.
“E servicio cu e trahadornan di e fundacionnan ta brinda na comunidad, ta uno cu den principio ta responsabilidad di gobierno, y semper gobierno e salario di trahadornan di fundacion a paga nan, y a mantene esakinan mescos cu a haci pa empleadonan publico”, Magaly Brito a señala.
