ORANJESTAD (AAN): International Regatta 2024 cu su diescuater edicion ta invita pueblo di Aruba pa bin disfruta di e diferente nabegacion
cu lo tuma luga na Oranjestad e fin di siman aki cumisando 28 di juni cu diescuater clase di careda: Optimists, SailQube, F11, Beachcats, Sunfishes, Lasers, Yachts Racing, Yachts Live Aboard cruisers, Yachts Multihulls, Miniatuurboats (30-35-40 inch), Windsurfers y Kites.
Bo ta cordialmente invita pa bin presencia Regatta su Opening Event na Regatta Village, Neptali Henriquez Park, diabierna 28 di juni for di 5’or di atardi pa 9’or di anochi, pa registracion y networking. Lo tin un cash bar obtenibel.
E Opening Ceremony di Regatta lo tuma luga 7’or di anochi cu nabegadonan, sostenedonan y patronisadonan hunto cu tur partners presente.
Riba diasabra 29 di juni tur Class Sailing Races lo tuma luga for di 9:00 am - 4:00 pm sigui pa Live Music alrededor di 5:00 pm - 9:00 pm cu Haerfen Pop Rock & Blues Band. Nabegadonan, sostenedonan y publico henter ta cordialmente invita.
Riba diadomingo 30 di juni, pa henter e dia lo tin All Class Sailing Races cu caredanan tumando luga for di trempan 9’or di mainta pa 3’or di atardi sigui pa Live Music entre 5’or di atardi pa 9’or di anochi cu The Originalz Band.
E ceremonia di premiacion di Regatta lo tuma luga diadomingo 30 di juni, 5:30 pm pa 7:00 pm (Youth 5:30 pm; Adults 6:30 pm.)
Aruba Regatta Foundation (ARF), su vision ta pa introduci mas hende na nabegacion y hiba nan mas cerca di naturalesa y experiencianan di watersport sostenibel. Regatta ta desea na yega na mas hende hoben cu ta posibel anto introduci e alegria di nabegacion na nan tur.
Na 2023, total di 75 nabegadonan a participa den mas cu cuarenta careda, durante dos dia yena di accion y premia nan 27 trofeo, specialmente diseña pa Regatta, traha pa medio di plastic y palo recicla.
Pa 2024, Regatta su meta ta pa atrae mas nabegadonan, boto y publico n’e Regatta Village, cual ta situa cerca di Surfside Beach banda di Neptali Henriquez su parke.
Publico ta keda cordialmente invita pa bin mira e spectaculo riba awa, disfruta di un dushi bebida, relaha y recorda nan mes riba kico di realmente kiermen un bida di isla. Un gradicimento ta bay na tur sponsor, partner y sostenedonan.
