Un encuentro historico ta tuma lugar awe na Aruba --- *Con Aruba mester cruza e cartera pa e yega futuro? --- *Un pais sin un base financiero sostenibel ta den problema
ORANJESTAD(AAN)—Awe Aruba ta escenario di un reunion historico. CAft, cu mester yuda e islanan Caribense di Reino Hulandes bandona problemanan financiero, lo mester reuni cu Gobierno di Aruba.
Desaroyonan a haci cu e intentonan den Reino pa busca un futuro solido pa e paisnan Hulandes den Caribe, a haya un sabor amargo cu nan no merece.
Awe ora CAft y Gobierno di Aruba bini hunto, hustamente Reino ta uni den buskeda di un solucion pa e futuro di Aruba, cu mester ta basa riba un base financiero sostenibel.
Ta hustamente e palabranan “base financiero sostenibel” awe mester bini dilanti y wordo comprende dor di tur hende.
Kico ta un “base financiero sostenibel”? E ta nifica cu e pais tin un base financiero cu e pais por carga y cu por duna resultado positivo pa e pais.
Un pais cu mester biba di prestamo no ta un pais autonomo pasobra e no tin e base cu ta forma su sosten financiero, pues cu ta sigura cu e tin placa pa e cubri su gastonan riba su propio forsa.
Historia di Aruba a duna prueba, cu debe ta uno di e peligernan mas grandi di un pais.
Na Aruba a keda demostra, cu un pais no por uza creacion di debe pa e forma un futuro, mas ainda si den e futuro aki deshaci di un parti importante di entrada di e pais, manera a pasa cu Aruba cu a deshaci di mita di BBO, loke a nifica cu a deshaci di entrada cu e pais tabata tin.
Un pais ta funciona mescos cu un famia, cu tin cierto entrada y gastonan, cu pa ley ta wordo regla den presupuesto, un palabra bunita pa loke tur cas di famia conoce, cu ta placa cu ta drenta y placa cu mester gasta.
Un pais ta un famia grandi, Si gasta mas placa cu ta drenta, mester haci prestamonan cu ta nifica tambe paga interes cu hopi biaha ta e factor cu finalmente ta zink un persona, famia of pais.
Tur ciudadano, tur famia tin e mes responsabilidad cu un pais tin, cu ta nifica cu ta gasta segun entrada ta permiti.
Na momento cu Aruba a baha su entrada na BBO y a crea mas debe, Aruba a trapa riba e base principal di un maneho financiero responsabel, cu ta e unico maneho sostenibel pa un pais, cu no kier zink den problema.
Na momento cu Covid-19 a bati na porta ya Aruba tabata discuti cu Hulanda con Aruba mester wordo goberna na un forma responsabel y no segun fantasia.
Hulanda a tuma medidanan cu Statuut ta permiti pa a scapa Aruba. E pregunta grandi ta keda kico lo a pasa cu Aruba, y por cierto tur e paisnan Hulandes den Caribe, si Hulanda no por a bisa cu ta basta.
Awe Gobierno di Aruba, cu Pueblo na forma democratico a scoge pa goberna e pais, mester sinta na mesa cu e comision cu ta encarga cu supervision financiero di Aruba.
E supervision Hulandes no a wordo introduci pa castiga Aruba, pero pa habri caminda pa solucion. Cu e no ta facil ta sigur.
E motibo pa e reunion ta sagrado. E ta e buskeda pa solucion pa Aruba cu mester paga su debenan pero tambe mester sigui dilanti.
Un dia importante ta bati na porta di Aruba cu na 1983 a duna prueba cu e ta un bon negociador ora e Status Aparte a bira realidad den Reino.
Awe ta cu e espirito y e mentalidad positivo di Aruba, nos ta keda den espera di e resultadonan di e reunion entre Gobierno di Aruba y CAft, cu hunto mester yuda Aruba cruza e caretera pa futuro!
