Mensahe di Minister di Finansa y Cultura Xiomara Maduro pa Dia di San Juan
ORANJESTAD (AAN): Diabierna dia 24 di juni, nos ta celebra Dia di San Juan, miho conoci como Dia di Dera Gai. Segun historia, e celebracion di Dia di San Juan a cuminsa na Mexico, despues a sigui pa Guatemala y Venezuela. Di Venezuela ela yega Aruba y na Aruba ta celebre mesun manera cu na Venezuela.
Na cuminsamento e tabata un fiesta di cosecha di e indjanan cu tabata habita akinan. Nan tabata gradici nan Diosnan pa un bon cosecha. Despues di tempo a bin combina e celebracion di iglesia, e nacemento di San Juan Bautista y asina celebra nan fiesta di cosecha riba 24 di juni. E tradicion tabata pa kima resto di cosecha riba Dia di San Juan.
Celebracion antes
E cunukero tabata celebra ‘cosecha bon’ y core cu fucu di ‘cosecha malo’. Un di e maneranan pa ‘core cu fucu’ tabata kimamento di productonan cu a resta di e cosecha bieu. E productonan aki tabata cadushi, troncon y resto di maishi. Cunukeronan tabata kima pa simbolisa purificacion y cambia suerte di cosecha malo cu e speransa cu e siguiente temporada di plantamento lo ta mihor.
Situacion actual
Awendia e acto di kimamento ainda ta tuma lugar. Lamentablemente materialnan cu ta causa molester den bario, haci daño na salud y nos medio ambiente ta wordo kima. E emision di kimico, huma y contaminantenan toxico causa pa kimamento di materialnan sintetico manera plastic y taira ta afecta nos aire, flora y fauna. Nos matanan, bestianan y awa ta wordo contamina. Ta kima hopi biaha obhetonan cu ta wordo kima no tin nada di haber cu e celebracion di ‘Dera Gai’ y ta daña nos medio ambiente.
Video di conscientisacion
Ministerio di Cultura cu cooperacion di Directie Natuur en Milieu (DNM), Bureau City Inspector y Brandweer a produci un video pa conscientisa nos comunidad pa celebra Dia di San Juan na un manera consciente y responsabel. E video lo wordo comparti na television y medionan social.
Un danki na cada instancia pa nan cooperacion. Por ultimo Minister Maduro a trece dilanti cu Cultura bo tin cu bib’e, pero nos Aruba mester cuid’e. Un feliz Dia di Dera Gai di parti Minister di Cultura Xiomara Maduro.
