Nada espectacular den declaracion di e strea nobo na cielo politico
*Posibel Prome Ministro Hulandes a presenta su programa
*Aruba ta parti di Reino cu lo sostene Fries y Papiamento
ORANJESTAD (AAN) — E lo reduci migracion pa Hulanda cu 50 Mil persona anual.
Hulanda lo conoce construccion di mas cas, pero e no ta papia di aumento di cuido pa mucha, pa evita cu e problema ta bira mas grandi.
Aruba ta den su programa como parti di Reino, cu tambe lo haya atencion mereci.
Un pakete total ta loke ta wordo splica como programa di e strea nobo na firmamento politico Hulandes, Pieter Omtzigt, cu segun espectativanan por gana eleccion na Hulanda.
Pa ta franco, gana eleccion na Hulanda na 2023, ta crea mas y mas e impresion di un careda di boto cu mester determina cual yate ta drenta haf mas sigur.
Un parti grandi di Pueblo Hulandes, no sa te ainda pa kende e mester vota dia 22 di November.
Tres partido ta na cabez. E partido VVD di Prome Ministro Hulandes actual, Mark Rutte mescos cu e partido Groen Links cu a uni cu e partido laboral y awor pues e partido nobo di Pieter Omtzigt, cu a haya hopi popularidad den e scandal Hulandes entorno e abuso cu Gobierno Mark Rutte a comete cu personanan cu tabata haya bijstand Hulandes pa mucha, cu a wordo persigui pa fraude y awe mester haya recompensa.
Omtzigt a bandona su partido moribundo CDA.
Cu e ta un bom politico, pero realmente politico, a bini dilanti den e forma cu el a laga publico spera riba su decision si e ta drenta politica cu su propio partido na 2023.
El a bisa originalmente cu e mes no kier bira Prome Ministro pero awor el a priminti, despues di a alcansa top di atencion, cu e ta bay pensa kico e lo haci si su partido bira e ganador di eleccion.
Te awor ta tres partido pues ta den e reto final pa eleccion y awor el a presenta su programa, cu mester nifica segun su persona un cambio den rumbo politico di Hulanda.
Un prome bista riba contenido di e programa di Omtzigt pa futuro Hulandes, ta confirma cu e ta sin duda un bon politico, pues politico, cu ta uza palabranan cu ta cay sigur na agrado di un parti grandi di votador na Hulanda, cu no ta di acuerdo cu nan experencianan cu e ultimo gobernacionnan di e pais.
Por papia mas o menos di un Programa All Inclusive, cu ta inclui tur loke hende por pensa ariba si nan papia di un topico, manera un gobernacion di un Reino cu ta haya reconocimento den e programa di Omtzigt.
E ta aclarea cu Reino ta mas cu solamente e teritorio Hulandes y ta inclui e paisnan di Reuno Hulandes den Caribe den e maneho total cu mester wordo hiba.
DIARIO ta den e prome etapa di estudio di e documento di Omtzigt, cu por bira e persona cu ta dirigi Gobierno di Reino Hulandes, cu e mes ta considera un Reino cu a conoce hopi cambio riba tur tereno debi na e cantidad di persona cu a bira miembro di e comunidad Hulandes.
Un Reino Plural, pa uza palabranan cu ta central den su programa, cu ta papia hasta di cada di fe religioso ta bini dilanti den e programa cu ta bisa cu den Reino Hulandes tin mas idioma cu solamente Hulandes loke tin su atencion tambe.
Pues mescos cu e idioma Fries di Friesland, Papiamento (nos ta asumi Papiamentu y Papiamento-red) lo tin su sosten.
Cu goberna un pais no ta nada facil, sigur ta bini dilanti den e programa di Omtzigt, cu ainda mester contesta basta pregunta di parti di DIARIO.
Renobacion ta loke e kier trece mientras e lo atende cu e costa di bida y otro problemanan cu ta afecta Hulanda.
Sueldo minimo lo subi pero e no ta bisa kico esaki lo encera. Pero lo tin reforma. Lo tin cambio den maneho di Gobierno, cu realmente mester ta e obhetivo di tur partido cu ta participa na un eleccion.
Lo no tin discriminacion y lo tin libertad di religion, pero tur religion mester bisa kico nan ta kere aden.
DIARIO den extenso pues lo bini cu e programa di e persona cu por bira Prome Ministro di Hulanda, cu manera tur informacion ta indica no ta pasando den e mihor momentonan di iluminacion politico sumamente necesario pa uno di e paisnan mas rico di mundo pero tambe cu e problemanan mas serio di mundo, manera e peligernan di cambio di clima pa un pais cu pa un parti a nace di laman, cu el a nabega pa crea un imperio cu a laga resultado den region di Caribe tambe y cu mester bini mas dilanti den e plannan pa futuro di henter Reino.
