E proyecto di renovacion di cas tin di haber cu atraccion pa turismo tambe

Norman Thijsen, Fundacion Savaneta:

ORANJESTAD (AAN) – Norman Thijsen, di Fundacion Savaneta, den entrevista cu DIARIO a splica cu

e proyecto di renovacion di cuater cas den e Distrito, cu nan ta desaroyando ya pa dos aña caba, tin di haber cu atraccion pa turismo tambe, pasobra nan kier mustra cu Savaneta tambe tin algo di ofrece.

            Esaki fuera cu Savaneta tin lama, su restaurantnan, y su balornan cultural y esey ta hopi importante. P’esey nos a haci un inicio aña pasa, y nos ta sigui cu cuater e aña aki. “Por imagina si nos logra 20 cas den futuro, e ora bo por crea un tour. Y e tour ta importante pasobra ya cu mi ta bay hopi den e area, mi ta wak hopi tour bus, cu turista ta baha saca potret caba”, Thijsen a menciona.

            E ta haya cu pesey e colornan y diseño ta hopi importante y esnan cu ta participando ta haci hopi combinacion. E mes tabata kier verf solamente geel cu blanco, pero e fundacion tin un artista pintor cu ta yuda y a aconseha nan pa pone otro colornan, manera blou y e ta combina varios color y por wak e bunita resultado. Asina nan ta traha cu ideanan di otronan tambe.

            El a reitera cu lo por pone un pilar di informacion tocante kico tur Savaneta ta ofrece, manera tin den Faro Blanco, unda ta bisa ki tempo e cas a wordo traha, ki famia a biba aden, entre otro datonan interesante.

            Den e proyecto aki e fundacion a bay hopi den tempo, y esey tin su balor pa e turistanan tambe. E ta convenci cu ningun famia doño di e casnan aki lo kier bende nan, pues e trabao cu e fundacion ta realizando a crea hopi impacto den e comunidad.

            Thijsen ta conciente cu enberdad no tin ley pa proteha casnan asina, cu no por wordo benta abao, y esey ta un riesgo cu e fundacion ta coriendo, pero si nan keda man cruza y no keda activo y pro-activo, pero nan a move, a verf, laga nan intacto, poco, poco por para un intencion di benta nan abao. E fundacion ta bezig pafo so (fachada) di e casnan pero ta respeta e parti paden cu ta priva.