E promedio di dianan cu e pashentnan cu Covid a keda na Hospital a baha di 10 pa 3 dia  

ORANJESTAD (AAN):  Gobierno a introduci dialuna un asina yama 'strategia di salida". Minister di Salubridad Publico y Turismo, Dangui Oduber a duna di conoce durante un conferencia di prensa

cu a bin ta monitoreando e situacion na Aruba cu e variante nobo.

Dia 20 di December 2021 a detecta e variante omicron na Aruba y desde e dia ey continuamente ta monitorea e desaroyo di e variante aki.

Aworaki despues di casi un luna, tin mas informacion y mas conocimento como data di e variante aki, con peligroso e ta y con contagioso esaki ta, Minister Oduber a remarca.

A mira cu durante fin di aña y comienso di aña a registra cifranan record di cantidad di casonan positivo nobo pa dia y casonan activo. Na dado momento a yega na mas cu 5 mil caso activo y a surpasa mas cu mil caso nobo activo pa dia mientras cu e 'positivity rate' tabata casi 70% y no obstante esey por a maneha e capacidad na Hospital, Oduber a bisa.

El a remarca cu obviamente tin presion, pero esaki tabata manehabel. Na e momentonan aki a logra reduci e cantidad di casonan activo. Ta experenciando un tiki presion, pero manehabel, e mandatario a splica. 

Variante DELTA

Segun datonan di hospital, por mira cu tin un diferencia grandi entre omicron y tur e otro variantenan. Un informacion cu el a kere ta importante pa comparti ta e promedio di edad di e personanan cu ta wordo admiti na hospital y tambe e duracion cu nan ta keda interna.

A haya informacion di Hospital for di e prome te cu e di 5 ola. Por haya cu e prome ola, e edad di e personanan cu tabata wordo admiti tabata casi 59 aña y e duracion na hospital tabata 15 dia, a bisa.

Durante e di dos ola, e edad a subi na 60 aña y e promedio di e cantidad di dia interna a baha na 9.8. Durante e di tres ola, edad promedio tabata 60 aña y e dianan cu nan a keda interna a subi un tiki na 10 dia.

E di cuater ola, e edad promedio a baha un tiki na 58.24 y e dianan cu nan a keda interna a subi na 11. 

Variante OMICRON

Pa loke ta e di 5 ola a mira cu e edad a baha na 57, pero e cantidad di dianan cu e pashentnan ta keda interna a reduci te na 3.7, e mandatario a duna di conoce.

Si compara esaki cu e otro olanan por conclui cu e variante omicron ta constata di ta menos peligroso, pero hopi mas contagioso y ta mira esaki den e cantidad di dianan cu un pashent ta keda admiti, Minister Oduber a señala.