ORANJESTAD (AAN): Dia 11, 12 y 13 di augustus 2026, San Nicolas lo bira centro di un proceso di desaroyo nacional sin precedente.
Durante e prome “Forum on the Future of San Nicolas”, Suzette Dumfries lo presenta e resultadonan di cinco aña di investigacion profundo den y riba San Nicolas cu a culmina den un vision, direccion y plan di desaroyo concreto pa San Nicolas.
E Forum ta un iniciativa di Suzette Dumfries, cu sosten di CEDE Aruba y PKF Dutch Caribbean & Suriname in Aruba. Pa prome biaha, un proceso ta wordo organisa cu ta trece Gobierno, Parlamento, institucionnan publico, sector financiero, companianan di seguro, inversionistanan, empresarionan, doñonan di propiedad, organisacionnan civil, profesionalnan, hobennan y residentenan di San Nicolas hunto pa compronde e realidad completo di San Nicolas y e direccion necesario pa su futuro.
Suzette Dumfries ta un Nation Builder y economista di desaroyo y cultura. Durante e ultimo cinco añanan, e a investiga e realidad economico, social, cultural, historico, espacial y institucional di San Nicolas. Awor e ta trece investigacion, e voz di comunidad y tur actor relevante hunto cu e meta di presenta un plan y un estructura integral di desaroyo pa San Nicolas.
E “Forum on the Future of San Nicolas” no ta un otro reunion pa papia solamente tocante revitalisacion. E ta inicio di un proceso di desaroyo nacional cu ta cuminsa cu evidencia, ta presenta e realidad y voz di San Nicolas, y despues ta traduci esaki den un plan concreto, un estructura pa implementacion y un ruta pa ehecucion. “San Nicolas no mester un otro promesa, un otro proyecto separa ni un otro conversacion sin continuacion. San Nicolas mester un direccion claro, un plan integral y un estructura cu por converti e plan den accion,” Suzette Dumfries a bisa.
E “Forum on the Future of San Nicolas” ta consisti di cinco fase. E prome dos fasenan lo wordo completa den augustus 2026. Durante Fase 1, dia 11, 12 y 13 di augustus 2026, Dumfries lo presenta e resultadonan di cinco aña di investigacion independiente. Durante tres anochi, publico lo haya un bista profundo di con San Nicolas a yega na su situacion actual, cua sistemanan economico formal y informal ta opera den e ciudad, cua bareranan structural ta tene desaroyo atras, y cua activo, talento, propiedad, cultura y oportunidadnan ainda no ta wordo probecha.
E investigacion ta mustra e conexion entre historia, economia, empleo, emprendemento, comercio, propiedad, vivienda, seguridad, migracion, explotacion, cultura, identidad, espacio publico, inversion y acceso na capital. Tambe lo presenta loke residentenan, empresarionan y otro stakeholdernan a expresa consistentemente tocante e futuro cu nan kier pa San Nicolas: e Voice of San Nicolas. “Pa cinco aña mi a studia San Nicolas for di aden pa pafor. Mi a mira su historia, su economia, su comunidadnan, su vulnerabilidadnan y su potencial. E momento a yega pa pone e evidencia completo dilanti di San Nicolas y Aruba, sin romantis’e, sin simplific’e y sin tapa loke ta incomodo,” Dumfries a declara.
Durante Fase 2, e Civic Forum di 20, 21 y 22 di augustus 2026, Dumfries lo presenta e propuesta pa un vision, un direccion di desaroyo y un Plan Regional Integral pa San Nicolas. E plan lo traduci cinco aña di investigacion den un direccion coherente cu ta conecta economia, planificacion espacial, desaroyo social, cultura, patrimonio, seguridad, vivienda, institucionnan, inversion, financiamento y implementacion. Ademas di e plan, lo presenta un estructura integral di desaroyo cu ta mustra con e proceso por wordo organisa, coordina, financia y ejecuta. Tambe lo discutí e areanan prioritario di desaroyo, e responsabilidadnan institucional y e ruta necesario pa pasa di planificacion pa realisacion.“Investigacion sin plan ta keda descripcion. Un plan sin investigacion ta bira suposicion. Pero un plan sin estructura tampoco por wordo ejecuta. E proceso aki ta uni evidencia, plan y estructura,” Dumfries a bisa.
Futuro di San Nicolas no por wordo separa di futuro di Aruba. Loke pasa na San Nicolas ta afecta empleo, comercio, inversion, propiedad, vivienda, seguridad, cultura, cohesion social y desaroyo economico di henter pais. P’esey, Suzette Dumfries ta trece tur stakeholders y residentenan di San Nicolas hunto den un solo proceso. “E meta no ta pa tur participante ta di acuerdo cu tur elemento di e plan. E meta ta pa cada actor ta informa, compronde e evidencia y mira claramente cua rol e por tin den futuro di San Nicolas”, Dumfries ta amplia.
“San Nicolas no por wordo desaroya sin San Nicolas. Pero San Nicolas tampoco por wordo desaroya pa su so. Gobierno, sector priva, institucionnan financiero, inversionistanan, organisacionnan civil y comunidad mester drenta e proceso y compronde nan responsabilidad,” Dumfries a enfatisa.
Presencia di residentenan di San Nicolas ta especialmente importante. “Si San Nicolas no ta presente, otro hende lo sigui papia pa San Nicolas. Esey no por sigui. San Nicolas mester aparece, scucha, papia y participa.”
E “Forum on the Future of San Nicolas” ta completamente gratis, pero registracion ta obligatorio. Registro pa e presentacion di resultadonan di investigacion dia 11, 12 y 13 di augustus 2026 ta disponibel via: https://www.suzettedumfries.com/sannicolas
Un link separa pa e Civic Forum di 20, 21 y 22 di augustus 2026 lo wordo anuncia pronto.
