E prome dia di 'Walk-in' pa haya 'Booster-shot' tabata exitoso

Minister Dangui Oduber --- ORANJESTAD (AAN):  Diamars 14 di December tabata e prome dia di 3 dia di campaña  unda por “walk in” na Centro Libertador Betico Croes na Santa Cruz pa busca e vacuna cu falta, sea ta prome dosis, di dos of e “Booster Shot”.

            Minister di Salud Publico, Sr. Dangui Oduber, ta contento pa comparti cu e acogida tabata uno exitoso.

            Akinan ta sigui algun informacion pa tene na cuenta ora di bay busca vacuna:

- Prome dosis; Pa ricibi prome dosis mester tin minimo 12 aña y mester presenta cu AZV. Muchanan menor di edad mester bin acompaña pa un mayor. E persona cu no tin AZV pero ta biba na Aruba, mester prueba cu eta biba na Aruba pa un periodo caba. Es cu tin paspoort Hulandes mester prueba cu e ta biba na Aruba pa mas cu 1 luna y es cu no tin paspoort Hulandes mester prueba cu e ta biba na Aruba pa mas cu 2 luna. Studiantenan Arubiano bibando den exterior por vacuna unabes cu nan ta na Aruba si nan por prueba cu nan ta studiando den exterior. 

- Di dos dosis; Pa ricibi di dos dosis e persona mester a ricibi su prome dosis mas cu 3 siman atras. E persona mester presenta cu su prueba di vacunacion anterior y su AZV.

- 'Booster Shot': Pa ricibi e 'booster shot' e persona mester tin minimo 55 aña y ta necesario cu e persona a ricibi su di dos dosis di vacuna mas cu 6 luna atras. E persona cu despues di a ricibi su di dos vacuna a test positivo pa COVID mester warda 6 luna despues di a test positivo pa busca su 'booster shot'.

            Un gran cantidad di hende ta acudiendo cual ta importante pa por sigui recupera economia.

Finalmente Minister Oduber kier a recorda comunidad cu tin 2 dia mas unda por pasa pa busca e vacuna cu bo falta y mustra un acto di solidaridad y responsabilidad pa boso mes, boso famia y boso pais.