ORANJESTAD (AAN) — Minister Glenbert Croes, titular di Labor, Energia y Integracion, a bisa den conferencia di prensa extraordinario,
Diamars atardi, cu e ta ofreciendo na 500 persona cu a haya FASE un curso yama “Change of Mindset” (Cambio di Mentalidad), cu lo wordo duna pa gobierno y cooperacion di Sector Priva.
Esnan cu tin mas tempo hayando sosten di FASE ta esnan prome yama pa tuma e curso. E mandatario a bisa cu mester realiza cu cambio di mentalidad ta importante pa logra un cambio positivo pa e persona mes.
El a reitera cu pa Aruba logra recupera “Her-Bij”, “Omscholing” ta fundamental. DPL lo ta yudando via Job Center cu Job matching, pa facilita empleo, yuda den “arbeidsbemiddeling”. E oportunidad di cursonan lo ta mediante lo ta via Enseñanza pa Empleo, FEPO, DOC Opleiding, y otro institutonan cu cual e “Plataforma Aruba Kier Traha”, lo ta trahando cune.
E plataforma aki lo haci “job matching” di tempo real, unda cu tambe den un cooperacion, entre gobierno, e gremionan comercial y sindical, lo coordina e trabaonan aki.
“Realiza cu esaki ta e unico manera pa pone Aruba riba pia, ta pa nos como personanan para bek riba pia, y pa nos pais bek riba pia”, Minister Glenbert Croes a subraya.
Por asumi, for di e declaracionnan di Minister Glenbert Croes, cu e trabaonan pa cual lo bay duna cursonan na esnan cu a haya FASE, cuminzando pa esun di “cambio di mentalidad”, ta mas tanto dirigi na sector Horeca y Turismo. El a bisa tambe cu e Plataforma Aruba Kier Traha, ta traha pa esnan cu lo por perde trabao ora cu loonsubsidie disparce. E tin bista riba e temporada halto di turismo cu ta den bin, unda e ta kere lo mester di trahador part time y full time, y den e sentido aki lo capacita hende pa subi e mercado laboral, practicamente specifico aki: horeca y turismo.
