Gobierno Eman a cumpra popularidad mundial cu realidad falso --- *DIARIO cu investigacion nobo di placa cu por a scapa Serlimar --- *Congresonan costoso pa “bira berde” mientras huma ta mata Aruba
ORANJESTAD (AAN) — “Go green”. Uno di e pruebanan di e euforia politico historico na Aruba, caminda placa di Pueblo a wordo gasta pa politiconan por a glorifica nan mes riba plataforma mundial mientras awe Aruba no tin 20 Miyon pa trece stabilidad den Serlimar.
Loke ta pasa na Serlimar ta sumamente grave.
Un compania di Gobierno no tin placa pa paga su debenan cu por bay bira problema serio pa Aruba cu mester mira con e ta haci pa atende cu un asunto sumamente importante pa salud di Pueblo.
Cada asunto cu trata di atende den seno di Serlimar ta topa cu otro misterio den e historia di sushi y mas sushi cu ta kima na dump, caminda ciudadanonan di Aruba por sigui sufri y haya malesa.
Investigacionnan cu DIARIO ta haci riba e desaroyonan na Serlimar ta duna prueba con mentira politica por wordo uza pa domina un Pueblo humilde.
Awe Mike de Meza y Benny Sevinger kier habri boca y papia di Serlimar. Awe Marisol Lopez-Tromp tambe kier tin algo di bisa.
Awor DIARIO ta papia!
A yega e momento pa Aruba investiga cuanto placa a bay na creacion di un “Green Aruba”?
For di momento cu e partido berde di Mike Eman a busca poder, Aruba a conoce Green Corridor, Go Green y tur loke ta laga hende un un sabor “berde”.
Cuanto placa a costa Aruba pa trece Al Gore, pa trece cantidad di hende conoci rond mundo Aruba pa “Go Green”?
Ora busca resultadonan concreto di “Go Green” for di e momento cu AVP sinta, ta mira fiesta y mas fiesta y encuentronan internacional cu a produci portretnan di gobernantenan di Aruba den publicacionnan mundial.
Portretnan cu no a inclui e dolor di e Arubiano cu a wordo expone na cancer y tur loke dump por produci, manera te awe ciudadanonan ta trece dilanti na Gobierno.
Cuanto placa a wordo gasta den asuntonan di Serlimar y loke ta resorta bou e encargo grandi di Serlimar pa percura pa medio ambiente di Aruba?
Con por ta cu Mike de Meza a ricibi honor pa e forma cu Aruba a “go green” y awe den Parlamento, Ministro Ursell Arends mester a mustra cu por garantisa trabou pa e trahadornan te inicio di 2021 pasobra Serlimar ta mas morto cu bibo financieramente?
Ta increibel cu gobernantenan tabata tene fiestanan internacional den cual nan tabata baila den “lime light” den luz berde y tabata gasta placa di Aruba pa un situacion falso, y e pais awe no por garantisa ni e trahadornan un futuro.
Kico lo pasa cu Serlimar? Kico Aruba mester haci awor cu su futuro ta “go black” despues cu politiconan aventurero a abusa di placa di e pais manera nan tabata kier?
Investigacion oficial mester bini. Documentonan mester subi mesa. Documentonan cu hasta ta indica cu por tin conflicto personal serio ora mira con esposo di Marisol Lopez-Tromp tambe a traha pa Serlimar.
DIARIO ta sigui tras di tur informacion cu ta drenta riba Serlimar, riba incinerator chikito y grandi pero sigur e abuso cu Aruba ta soporta.
Awe Pueblo di Aruba ta paga pa un debe nacional, cu sigur a sirbi partidonan manera AVP, cu a percura pa Aruba “go green” y pa awe tur luz paga na Aruba cu no tin sikiera un servicio stabil pa atende cu sushedad y cu lo mester bay dera sushi, si Serlimar bati bancarota.
